Koshaa wode, Yihooway Eelaasa, ‘Siraafita ba. Issi amˈˈiyaa neeyyo qumaa immana’ yaagiis. I katamaa penggiyaa gakkiyo wode, issi hiyyeesa amˈˈiyaa mittaa mixiyaaro beˈiis. I issi bule haattaa o oychiis. A haattaa ehaanawu biishin, i guyyessan Eelaasi o xeesidi, ‘Guutta baso oyttakka ekkada yarkkii’ yaagiis. SHin amˈˈiyaa hagaadan gaasu: ‘Taayyo neessi immiyo oytti baawa. Tawu deˈiyay ta naˈaassinne taassi guutta oyttaa uukkana xallawu gidiya xiillenne zayte.’ Eelaasi, ‘Neeni taayyo guutta oyttaa uukkikko, ne xiilleenne zaytee iray zaarettidi bukkana gakkanaashin wurenna giidi Yihooway qaalaa geliis’ yaagiis.

Hegaa gishshawu amˈˈiyaa soo baada, Yihooway kiittin hananabaa yootiyaagawu oyttaa uukkaasu. Yihooway qaalaa gelidoogaadan, amˈˈeeyoonne i naˈaayyo koshaa wode qumay wuribeenna. I otuwan xiilleenne i xaaruwan zaytee ubbatoo kumetta.’

Hegaappe simmin issi metoy merettiis. Amˈˈee guutta naˈay keehi sahettidi hayqqiis. Eelaasi maaddanaadan a minttada woossaasu.  Eelaasi i kiyuwaappe naˈaa ekkiis; ekkidi i keettaa bolli keexettida issi kifiliyaa kiyiis. I naˈaa arssan zinˈˈissidi, ‘Yihoowa, hayyanaa ha naˈaa hayquwaappe dentta’ yaagidi woossiis. Yihooway oottidobay maalaalissiyaaba gidiyoy aybissakko neeni eray? Nuuni eriyoogaadan, hegaappe kase oonikka hayquwaappe denddi erenna gishshataassa. Qassi ha amˈˈiyaanne i naˈay Israaˈeela asa gidokkona.

SHin naˈay paxidi, shemppiyoogaa doommiis! Eelaasi amˈˈeeyyo, ‘Beˈa! Ne naˈay paxiis’ yaagiis. A keehi ufayttada, Eelaasayyo hagaadan gaasu: ‘Neeni tumuppe Xoossaa asa. Neeni Yihooway yootiyoobaa xallaa haasayiyo gishshawu taani hegaa erays.’