Maintany tamy zen̈y, ke ho Jehovah taminy Elia: ‘Mindao a Zarefata, fa misy man̈angy maty vady zay an̈y, han̈amia han̈iny anao.’ Koa fa navy tamy barony tanàna io Elia, nahita man̈angy masikiny namory hazomaty. Nangataka rano ndreky mofo taminany Elia. Ho man̈angy io: ‘Zaho tsisy mofo e, efa lafariny ndreky menaka hely han̈amboarako mofonaka ndreky niny zanako fo ao.’ Ho Elia: ‘Jehovah nivolan̈a fa anao koa man̈amia mofo zaho, tsy ho lany lafariny ndreky menakanao, firaka mahaleny latsaka.’

Nody man̈angy io nan̈amboatra mofo namian̈a paminan̈iny Jehovah. Narin̈y ankitin̈y volan̈a Jehovah, fotony tsy lany foeky lafariny ndreky menakany man̈angy io. Nisy hanin̈y fo iro roeny zanany.

Nisy raha nampalahelo nandalo. Narary mare zanaka man̈angy io, ke naty. Man̈angy io nangataka vonjy taminy Elia.  Nalainy Elia taminany tsaiky io, nampandriny taminy efitry tan̈abo tao, avio izy nivavaka: ‘Jehovah, ataova velon̈o tsaiky ty e.’ Maventy fahagagan̈a nataony Jehovah io! Hainao nan̈ino? Io sambany olo naty nivilomin̈y, baka io koa tsy Israelita izy ndreky mamany.

Velon̈o tsaiky lelahy hely io! Ho Elia tamy man̈angy io: ‘Velon̈o zanakanao!’ Ravoravo mare man̈angy io, ke hoizy taminy Elia: ‘Anao panompony Zan̈ahary ankitin̈y, fotony zay raha irahiny Jehovah volan̈inao fo ambaranao.’