Mundaŵi ja cilala, Yehofa ŵamsalile Eliya kuti, ‘Mjawule ku Salefati, kweleko jwamkongwe jwamasije cakampe yakulya.’ Pa yipata ya msindawo, Eliya ŵam’weni jwamkongwe jwamasije ali mkulokota sasu. Jwalakwe ŵam’ŵendile jwamkongwejo mesi gakumwa. Ali mkwawula kujigala mesigo, Eliya ŵam’ŵilasilesoni ni kum’ŵenda kuti, ‘Conde anjigalilesoni mkate.’ Nambo jwamkongwe jwamasijejo jwatite, ‘Nganingola mkate uliwose wakuti nape. Ngwete utandi ni mawuta gamnono gakulinganyicisya cakulya ca une ni mwananguju.’ Eliya ŵamsalile jwalakwe kuti, ‘Yehofa asasile kuti naga mkundelecela mkate, utandi wenu ni mawuta genu ngasiyimala mpaka ula jiciyika.’

Jwamkongwe jwamasijejo, jwapite kunyumba jakwe kukumlinganicisya mkate jwakulocesya jwa Yehofajo. Mpela muŵasimicisye Yehofa jwamkongwe ni mwanagwejo nganasoŵa yakulya ndaŵi josope ja cilala. Mlulo lwa utandi soni lwa mawuta nganiyimala.

Kaneko kwatendekwe cindu cakutesya canasa. Mwanace jwa jwamkongwe jwamasijejo jwalwasile mnope mwamti jwawile.  Jwamkongwejo jwam’ŵendile Eliya kuti amkamucisye. Kaneko Eliya ŵamjigele mwanacejo nikwawula najo m’cipinda ca mwinani ca m’nyumba jakwe. Jwalakwe ŵamgonece mwanacejo pacindanda kaneko ŵapopesile kwa Yehofa kuti, ‘Conde ampesoni umi mwanaceju.’ Ana mkumanyilila ligongo lyakwe yeleyi yaliji yakusimonjesya? Ligongo tukumanyilila kuti kwaliji kutanda kuti Mlungu amjimusye mundu ku ŵawe. Soni jwamkongwe jwamasije ni mwanagwejo nganaŵa Ayisalayeli.

Kaneko mwanacejo ŵaŵelesoni cijumi. Eliya ŵatite kwa jwamkongwejo, ‘Mlole, mwanagwenu ali cijumi.’ Jwamkongwejo jwasangalele mnope ni jwatite kwa Eliya, ‘Yili yisyene kuti wawojo ali mundu jwa Mlungu. Ngumanyilila yeleyi ligongo lyakuti akusaŵeceta yaŵasalile Yehofa kuti aŵecete soni yikusatendekwa.’