Teʼ kʼiinoʼob maʼ kʼáaxak jaʼoʼ, Jéeobaeʼ tu yaʼalaj tiʼ Elías: ‹Xeen tu kaajil Sarepta. Teʼeloʼ tiʼ kajaʼan juntúul viudaiʼ, letiʼ kun tsʼáaik baʼal a jaante›. Tu yookbal le kaajoʼ, Elíaseʼ tu yilaj juntúul viuda óotsil táan kaʼach u molik siʼ. Elíaseʼ tu kʼáatajtiʼ junpʼíit jaʼ u yukʼe. Le ka bin le koʼolel u chʼaʼ le jaʼoʼ, Elíaseʼ tu yaʼalajtiʼ: ‹Beet uts xan a taasikten junxéetʼ waaj›. Chéen baʼaleʼ le koʼoleloʼ tu yaʼalajtiʼ: ‹Maʼ tu páajtal in tsʼáaiktech mix baʼal, minaʼanten waaj. Chéen yaanten junpʼíit harina yéetel junpʼíit aceite utiaʼal in beetik baʼal in jaante yéetel utiaʼal u jaant in hijo›. Elías túuneʼ tu yaʼalajtiʼ: ‹Jéeobaeʼ tsʼoʼok u yaʼalikeʼ wa ka beetikten junpʼéel chan waajeʼ, maʼ kun xuʼupul le aceite yéetel le harina yaan ta nuʼukuloʼob le táan le yáaxkʼiinoʼ›.

Le koʼoleloʼ bin tu yotocheʼ ka tu beetaj waaj u jaant le profetaoʼ. Úuch jach jeʼex tu yaʼalil Jéeobaoʼ, le koʼolel yéetel u chan hijooʼ anchaj baʼal u jaantoʼob le táan le yáaxkʼiinoʼ. Le aceite yéetel le harina yaan tu nuʼukuloʼoboʼ maʼ xuʼupiʼ.

 Ka tsʼoʼokeʼ úuch junpʼéel yaayaj baʼal. Jach kʼojaʼanchaj u chan hijo le koʼoleloʼ ka kíimi. Letiʼeʼ tu kʼáat óoltaj tiʼ Elías ka áantaʼak. Elías túuneʼ tu chʼaʼaj le chan xiʼipal tiʼ u maamaoʼ ka tu bisaj tiʼ junpʼéel cuarto yaan kaʼanal. Ka tsʼoʼokeʼ tu chikúuntaj teʼ camaoʼ ka orarnaj beyaʼ: ‹Kiʼichkelem Yuum Jéeoba, in Dios, beet uts a beetik u kaʼa kuxtal le chan xiʼipalaʼ›. ¿A wojel wa baʼaxten jatsʼuts ka u beet Jéeoba lelaʼ? Tumen tak teʼ súutuk jeʼeloʼ mix juntúul máak kaʼa kuxkíintaʼak. Tsʼoʼoleʼ le koʼolel yéetel u chan hijooʼ maʼ israelitaʼobiʼ.

Le chan xiʼipal túunoʼ káaj u chʼaʼik u yiikʼeʼ ka kuxlaj tu kaʼatéen. Elíaseʼ tu yaʼalaj tiʼ le koʼoleloʼ: ‹Ilawile, a hijoeʼ kuxaʼan›. Letiʼeʼ jach kiʼimakchaj u yóoleʼ ka tu yaʼalaj tiʼ Elías: ‹Beoraaʼ in wojleʼ jach tu jaajil ka meyajtik Dios, yéetel le baʼaxoʼob ka waʼalikoʼ jach tu jaajil tiʼ Jéeoba u taal. Le oʼolal ku béeytaloʼob›.