Ti regbo ugure, Yekova aya fu Eriya wẽ: ‘Mo ndu ku Sarefata yo. Dekurugbo du yo nika fu riahe foro.’ Eriya abi rungorungo dekurugbo ri nidungura nyake ti ngbadimo bakporo. Ko asana ri tipa mbirimbiri ime. Wa ri aandu ka ye na ime, Eriya ayambu ri ki ya: ‘Mo ki ye na kpakuto fere.’ Ono gu dekurugbo re aya: kpakuto bere ka mi fuhe foro te. Kina wiri bete ngungo du bere na nzeme mi nika manga wiri riahe na ni ani rihe na wire.’ Eriya aya fu ri wẽ: ‘Yekova akidohe nga ka mo mangi kpakuto fere, gamo ngungo na nzeme anyasanga te daho mai nika na ni berewe.’

Sidu, gu dekurugbo re andu ku kporo yo na ki mangi kpakuto fu ga Yekova nebi. A wa Yekova akidohe, ti regbo gu ugure naadu re, riahe aanyasanga be gu dekurugbo re na wiiri te. Gari pere nga ga ngungo gbiati nzeme aanyasanga te.

Sidu, gbegberẽpai amangi. Tooni wiri gu dekurugbo re ati na kaza na ki kpi. Ri azungadi Eriya tipa undo. Eriya adi gu gude re  beri na ki ndu na ko ku rogo gu vurobambu naadu ariyo. Ko apigi ko rii ba na ki kpari nga: ‘Ako Yekova mi nazungadi ro mo karaganga unga gi gude re ku rogoko yo.’ Mo iningo tipagine du ka gipai re adu ti ni ni iˈiriwopai ka Yekova amangihe? Mbiko a wa ani nainihe, boro ho nazingi mbata be kpio te. Na zavura gu dekurugbo re na wiiri aadunga ni aYisaraere a te.

Ono unga gu gude re akaragatihe ku rogo koyo, na ko ki tona ka onga! Eriya ki ya fu gu dekurugbo re wẽ: ‘Mo bi! Wiro ni unga ko.’ Ri adu na bakere ngbarago kisusi na ki ya fu Eriya: ‘Mo nzunzu nga ga Mbori kumba. Mi inihe mbiko mo nape kina boro gupai Yekova napehe foro mo gumbaha.’