Acab reyejj Jezreel markankir palaciopan ventanapatwa mä suma uva yapu uñjäna, ukajj Nabot chachankänwa. Acab reyejj uka yapu wal munasajj alasiñ munäna. Ukampis Nabot chachajj janiw aljañ munkänti. Diosan Leyiparjamajja, awkejj herenciat jaytkäna uk janiw aljapjjañapäkänti. Ukhamajj Nabot chachajj kunatï cheqäki ukakwa luraskäna, ¿Acab reyejj ukar respetpachänti? Janiwa. Antisas wal colerasïna. Janiw cuartopat mistuniñsa ni manqʼañsa munkänti.

Acab reyin jan sinttʼasiri Jezabel warmipajj akham sänwa: ‘Jumajjay Israel markan reyipästajja, kuntï munkta ukwa katusisma. Nayaw uka yapu aparasajj jumar churäma’ sasa. Ukatwa uka markankir jilïr irpirinakar akham sasin cartanak qellqäna: ‘Nabot chacharojj Diosar maldisirit juchañchapjjam, qalampi jaqjasin jiwayapjjarakim’ sasa. Kuntï Jezabel warmejj siskäna ukwa jilïr irpirinakajj lurapjjäna. Ukatjja Jezabelajj akham sasaw Acab reyir säna: ‘Nabot chachajj jiwatäjjewa. Uva yapupajj jumankjjewa’ sasa.

Jezabelajj janiw uka jaqeruk jiwaykänti, jan ukasti Jehová Diosar munasiri walja jaqenakaruw jiwayäna. Uka warmejj idolonakaruw adoräna, kunayman jan walinak lurarakïna. Jehová Diosajj uka jan walinak luratap uñjaskänwa. ¿Diosajj jupar castigpachänti?

Acab reyin jiwatapatjja, Jehoram yoqapaw reyëjjäna. Ukapachaw Jehová Diosajj Jezabelaru familiaparu castigañatakejj Jehú chachar khitäna.

Jehú chachajja Jezabelajj jakkäna uka Jezreel markaruw carropat saräna. Jehoram reyejj jupamp jikisiriw carropat jutarakïna. Jehoramajj Jehú chachar uñjasajja, ‘¿sumankañ amtampit jutta?’ sasaw jisktʼäna. Jupajj sarakïnwa: ‘Jezabel mamamajj jan walinak luraski, ¿kunjamarak sumankañajj utjaspasti?’ sasa. Uk istʼasasti Jehoramajj carropat kutjtaskäna, ukhamaruw Jehú chachajj flechtʼas jiwayäna.

 Ukatjja Jehú chachajj Jezabelan palacioparuw saräna. Jezabelajj jupan jutaskatap yatïna ukhajja, wal nayranakap pintasïna, ñikʼutapsa sum kʼachachtʼasirakïna. Altus utan ventanapatwa suyanïna. Jehú chachajj purinïna ukhajj jiskʼachir arunakampiw Jezabelajj aruntäna. Jehú chachajj jupa jakʼankkäna uka servirinakarojj ‘¡jaqoqanipjjam!’ sasaw säna. Jupanakajj ventanatwa jaqoqapjjäna, Jezabelajj uka altot jalaqtasaw jiwjjäna.

Uka qhepatjja, Jehú chachajj Acab chachan 70 wawanakaparuw jiwarayäna, Baal diosar adorapkäna uksa chhaqtayarakïnwa. Jehová Diosajj taqe kunwa uñjaski, horasaparuw jan walinak luririnakarojj castigaraki, ¿uk amuytati?