Natatanaw ni Hading Ahab hali sa bintana kan palasyo niya sa Jezreel an ubasan ni Nabot. Gusto iyan bakalon ni Ahab. Pero habo iyan ipabakal ni Nabot dahil sabi sa Katugunan ni Jehova, dai dapat ipabakal an minanang daga. Iginalang daw ni Ahab si Nabot dahil ginibo kaini an tama? Dai. Angguton si Ahab. Dai siya nagluwas sa kuwarto tapos habo niyang magkakan.

Sinabi ki Ahab kan maraot niyang agom na si Reyna Jezebel: ‘Ika baga an hadi kan Israel. Makukua mo an gabos na gustuhon mo. Ako an makua kan dagang iyan para saimo.’ Nagsurat siya sa kamagurangan na lalaki kan siyudad para sahutan ninda si Nabot. An isasahot ninda iyo na isinumpa kaini an Diyos, kaya bilang padusa, dapat ining garapuon para magadan. Ginibo iyan kan kamagurangan. Pagkatapos, sinabi ni Jezebel ki Ahab: ‘Gadan na si Nabot. Saimo na an ubasan.’

Bako lang si Nabot an daing sála na ipinagadan ni Jezebel. Dakul siyang ipinagadan na mga namumuot ki Jehova. Nagsasamba siya sa mga diyos-diyosan tapos naggigibo nin iba pang maraot na bagay. Nahihiling iyan gabos ni Jehova. Ano daw an gigibuhon saiya ni Jehova?

Pagkagadan ni Ahab, an aki kaining si Jehoram an nagin hadi. Isinugo ni Jehova si Jehu para padusahan si Jezebel saka an pamilya kaini.

Nagsakay si Jehu sa karwahe niya para dumanan si Jezebel sa Jezreel. Nagsakay man si Jehoram sa karwahe para sabaton si Jehu, asin hinapot ini: ‘Para sa katuninungan an tuyo mo digdi, Jehu?’ Nagsabi si Jehu: ‘Dai magkakaigwa nin katuninungan sagkod na naggigibo nin maraot an saimong inang si Jezebel.’ Papabirikon pa kuta ni Jehoram an karwahe niya para makadulag. Pero pinana siya ni Jehu kaya nagadan siya.

 Dangan nagduman si Jehu sa palasyo ni Jezebel. Kan maaraman ni Jezebel na maabot siya, nagparapagayon ini, tapos naghalat sa may bintana sa itaas kan palasyo. Bakong magalang an pagbati niya ki Jehu pag-abot kaini. Nagkurahaw * si Jehu sa mga suruguon ni Jezebel: “Ihulog nindo siya!” Ihinulog ninda si Jezebel hali sa bintana kaya buminagsak ini sa daga asin nagadan.

Pagkatapos, ipinagadan ni Jehu an 70 aking lalaki ni Ahab asin hinali sa Israel an pagsamba ki Baal. Bako daw na nahihiling ni Jehova an gabos na bagay asin sa tamang panahon, pinapadusahan niya an mga naggigibo nin maraot?