Imfumu Ahabu yalemona ibala lya myangashi ilya kwa Nabote nga nayikala mwi sano lyaiko mu Yesreele. Ahabu alefwaya ibala lya kwa Nabote, kabili amwebele ukuti amushitishe. Lelo Nabote alikeene pantu Amafunde ya kwa Yehova yalikeenye ukushitisha impanga ya lupwa. Bushe Ahabu alicindike Nabote ifi acitile ifyo Lesa alefwaya? Awe. Ahabu alifulilwe sana. Alifulilwe ica kuti talefuma na mu muputule alelaala, kabili alekaana no kulya.

Namfumu Yesebele umukashi wa kwa Ahabu ali umubi umutima. Aebele Ahabu ati: ‘Imwe muli mfumu ya Israele. Kuti mwakwata icili conse ico mulefwaya. Nalaya mupokela ibala.’ E ico, Yesebele alembele amakalata ku bakalamba ba musumba, no kubeba ukuti babepeshe Nabote ukuti alituka Lesa, kabili bamupoole amabwe mpaka afwe. Abakalamba balicitile ifyo Yesebele abebele, lyena Yesebele aebele Ahabu ati: ‘Nabote nafwa. Ibala lya myangashi nomba lyenu.’

Nabote te o fye Yesebele aipeye ukwabula umulandu, alipeye na bantu abengi abatemenwe Yehova. Yesebele alepepa ifilubi kabili alecita na fimbi ifyabipa. Yehova alimwene ifyabipa fyonse ifyo Yesebele alecita. Finshi Yehova ali no kumucita?

Ilyo Ahabu afwile, umwana wakwe Yehoramu e waishileba imfumu. Yehova atumine Yehu ku kukanda Yesebele no lupwa lwakwe.

Yehu aninine pe celeta lyakwe no kuya ku Yesreele ukwaleikala Yesebele. Yehoramu na o aninine iceleta no kuya mu kukumanya Yehu, kabili amwipushe ati: ‘Bushe kuli umutende?’ Yehu amwaswike ati: ‘Takuli umutende pantu Yesebele noko alacita ifyabipa.’ Yehoramu alefwaya ukwalulula iceleta lyakwe pa kuti abutuke. Lelo Yehu alilashile Yehoramu ubuta, no kufwa afwa.

 Lyena Yehu aile kwi sano lya kwa Yesebele. Ilyo aumfwile ukuti Yehu aleisa, apentele inkopyo, asakula no mushishi bwino, aikala na pe windo lya pa muulu alamulolela. Ilyo Yehu afikile, Yesebele amuposeshe ukwabula umucinshi. Yehu apundilile ababomfi ba kwa Yesebele abaiminine mupepi nankwe ati: “Muponesheni pa nshi!” Awe e fyo basunkile Yesebele ukufuma pe windo, aponena pa nshi no kufwa afwa.

Pa numa ya ifi, Yehu aileipaya abana ba kwa Ahabu abaume 70, kabili alyonawile na fyonse ifyo balebomfya pa kupepa Baali. Bushe wamona ukuti Yehova aleshiba fyonse kabili pa nshita yakwe umwine alakanda abacita ifyabipa?