Raja Ahap tading i daerah Jesreel. Sanga ia natap-natap arah jendela idahna sada kebun anggur, jang sekalak dilaki si gelarna Nabot. Ngena kel ate Ahap nandangi kebun anggur e janah tukurna atena i bas Nabot nari. Tapi la nggit si Nabot, perban bas Hukum Jahwe taneh warisen la banci idayaken. Meriah nge ukur Ahap sanga ilakoken Nabot kai si benar? Lang. Segat kel ate Ahap man Nabot. Nembeh kel atena janah lanai ia nggit ndarat arah kamarna nari, ras lanai ia nggit man.

Diberu Ahap eme Ratu Isebel si jahat. Nina man Ahap, ‘Kam me raja Israel. Kai pe atendu banci nge datndu. Kubuat kari kebun e man bandu.’ Itulis Isebel surat man peminpin i bas kota, isuruhna kalak e nuduh si Nabot erdosa man Dibata janah arus ibenteri alu batu. Ilakoken peminpin e bagi si ikataken Isebel. Emaka nina Isebel man Ahap, ‘Nggo mate si Nabot. Nggo banci buatndu kebunna.’

Labo Nabot saja kalak si la ersalah si ibunuh Isebel. Nggo melala kel ibunuhna kalak si ngkelengi Jahwe. Isembah Isebel patung-patung janah ilakokenna kai si jahat. Ieteh Jahwe kerina kejahaten si ilakoken Isebel. Kai si ilakoken Jahwe man ia?

Kenca mate si Ahab, anakna me si jadi raja, eme Joram. Isuruh Jahwe si Jehu guna munuh si Isebel ras keluargana.

Lawes me si Jehu naik gereta ku Jesreel, ingan tading si Isebel. Reh me Joram alu geretana njumpai Jehu, nce sungkunna Jehu, nina, ‘Me labo lit masalah?’ Nina Jehu, ‘Banci kin la lit masalah, adi nandendu si Isebel jahat denga?’ Emaka iputar Joram me geretana janah kiam atena. Tapi ipanah si Jehu me Joram, janah mate me ia.

 Kenca si e, lawes me Jehu ku istana Isebel. Sanga ieteh Isebel si Jehu nandangi reh ku rumahna, mis ia ermekap, janah isurina bukna, nce itimaina i deher jendela. Sanga seh Jehu i je, ialo-alo Isebel ia alu kasar. Nce nina Jehu man pelayan-pelayan si cinder i deher Isebel, ‘Dabuhken ia ku teruh!’ Emaka idabuhken kalak e si Isebel arah jendela nari, nce mate me ia.

Dung e, ibunuh Jehu 70 anak Ahap ras kerina si nembah man Baal i negeri e. Emaka, banci sipelajari maka idah Jahwe nge kerina si terjadi, janah bas waktu si tepat pasti iukumNa kalak jahat.