Makita ni Haring Ahab gikan sa bentana sa iyang palasyo sa Jezreel ang ubasan sa tawong ginganlag Nabot. Gusto ni Ahab nga maiyaha ang ubasan, ug gisulayan niya kinig palit. Pero wala ni ibaligya ni Nabot kay supak sa Balaod ni Jehova nga ibaligya ang gipanunod nga yuta. Nalipay ba si Ahab kay husto ang gihimo ni Nabot? Wala. Tungod sa grabeng kasuko ni Ahab, wala siya mogawas sa iyang kuwarto ug wala mokaon.

Giingnan si Ahab sa iyang daotang asawa nga si Rayna Jezebel: ‘Ikaw ang hari sa Israel. Maangkon nimo ang bisan unsa nga imong gusto. Naa koy himoon para maimoha nang yutaa.’ Iyang gisulatan ang mga lider sa siyudad nga pasanginlan si Nabot nga nagtunglo sa Diyos dayon batoon siya hangtod mamatay. Gituman sa mga lider ang gipabuhat ni Jezebel, dayon giingnan ni Jezebel si Ahab: ‘Patay na si Nabot. Ikaw nay tag-iya sa ubasan.’

Dili lang si Nabot ang inosenteng tawo nga gipapatay ni Jezebel. Daghang tawo nga nahigugma kang Jehova ang iyang gipapatay. Tigsimba siyag mga idolo ug daghag daotang gihimo. Pero kining tanan nakita ni Jehova. Unsay iyang gihimo kang Jezebel?

Pagkamatay ni Ahab, nahimong hari ang iyang anak nga si Jehoram. Nagpadala si Jehova ug usa ka tawo nga ginganlag Jehu aron silotan si Jezebel ug iyang pamilya.

Misakay ug karwahe si Jehu paingon sa Jezreel, diin nagpuyo si Jezebel. Misakay pod ug karwahe si Jehoram, mitagbo kang Jehu, ug miingon: ‘Kalinaw ba ang imong tuyo?’ Si Jehu mitubag: ‘Walay kalinaw samtang naghimog daotan ang imong inahang si Jezebel.’ Gipaliko ni Jehoram ang  iyang karwahe aron unta moikyas. Pero gipana ni Jehu si Jehoram, ug namatay siya.

Dayon miadto si Jehu sa palasyo ni Jezebel. Pagkadungog niya nga nagpadulong si Jehu, nagpaguwapa siya ug naghulat sa may bentana sa itaas. Pag-abot ni Jehu, giinsulto siya ni Jezebel. Misinggit si Jehu sa mga sulugoon ni Jezebel nga nagtindog tapad niya: “Ihulog siya!” Busa ilang gituklod si Jezebel sa bentana, nahulog siya, ug namatay.

Human niana, gipapatay ni Jehu ang 70 ka anak nga lalaki ni Ahab ug gipahunong ang pagsimba kang Baal. Busa nahibalo gyod si Jehova sa tanan, ug sa hustong panahon iyang silotan ang naghimog daotan.