Mwene Akab mukadda Jezrayel, agemela vajanelani naye, wanwodha woona zundde na mvidera na Nabot. Akab wanfuna zunddena, nanda wahimulogana Nabot wi amugulihedhe. Nabot kafunile vowi koguliha agahilupa Nlamulo na Yehova naloga wi zundde nohalana kanigulihiwe. Koddi Akab wahiriha yosakula ya Nabot yokodda oguliha zundde? Nne. Akab wahisiridhiwa vaddiddi. Wahinyonyeya, ofiyedha ogunanti vakamani vaye bang’anedhe wiruguni, vina onyanyala oja.

Mwadhi wa Akab wali Musano wabure Jezabel, omwaddela dhahi: ‘Nyuwo muli mwene wa Izrayel. Enfunenyu munokaana. Kattugareyani miyo ddinele ouvahani nddebena.’ Iyene oalebela makarta anddimuwa otene a musidadi, awaddelaga wi amuzivalele Nabot wi omveyiha Mulugu, agamala anvokedhe malugu ofiyedha okwa. Anddimuwayá ahira dhetene dharumile Jezabel, venevo iyene ovenya omwaddela Akab: ‘Nabot omala okwa! Nddebe ddabuno ttenyu.’

Jezabel wahapela yovene attu enji ottiya Nabot bahi. Iyene wahapa attu enjene amukwela Yehova. Ohebedha dhigamuttu, ohira dhilobo gwé dhawopiha. Dhetene eso dhipadduwagavi Yehova wela woona mento. Agamukosilena dhavi Jezabel?

Mukweli Akab, mwanaye Jorau omuhaba mpaddo. Yehova omuruma mulobwana wakuweliwa Jeú wi amuttonge Jezabel na murala waye.

Jeú oheddiha karo yaye mpaka o Jezrayel wakala Jezabel. Jorau ohidha na muva waye, ogumana na Jeú, onvuza: “Weyo Jeú ondhana osanzaya?” Jeú omwakula: ‘Ddindhana osanzaya dhavi oku mayo Jezabel akosaga dhilobo  dhabure?’ Jorau ozugunutxa muvaye bagafuna ottawa. Jeú moneliye wila Jorau onottawa onddamula nyambusa omulatana, okwa.

Nomala Jeú ovenya odhowa vani va Jezabel. Mwiwalele Jezabel wi Jeú oli mudila, ovikattela dhokoddeliha omentoni, osaddula mento aye na nttittina, odhowa oturumela vajanelani. Jeú mfiyedhiye, Jezabel omulejela. Jeú ohakuwela ali na iyene. “Kamponyedheni vati apa!” Amuttidda Jezabel amponyedha vati ogwa, okwa.

Jeú mmaleliye okosa dhetene eso, owapa ana Akab 70, okuputtiha mpule mwebedhiwa Baal. Eji entapulela wila Yehova onoziwa vina onowona dhilobo dhotene, nanda iyene onele wajuguja otene ankosa dhabure!