Edidem Ahab ama esida ke window ufọk esie ke Jezreel okụt in̄wan̄ vine Naboth. Ahab ama oyom in̄wan̄ oro, onyụn̄ odomo ndinam Naboth anyam in̄wan̄ oro ọnọ imọ. Edi Naboth ama esịn sia Jehovah ikenyịmeke owo esinyam isọn̄ mme ete ete esie. Ndi esịt ama enem Ahab nte Naboth mîkamaha ndibiat ibet Abasi? Ihih. Esịt ama ayat enye tutu enye odụk esịt ubet esie ekesịne, imaha ndidia udia.

Jezebel, idiọk ọbọn̄ an̄wan emi ekedide n̄wan Ahab, ama ọdọhọ Ahab ete: ‘Afo edi edidem Israel. Emekeme ndinyene se ededi emi oyomde. Mmọn̄ mbọ isọn̄ oro nnọ fi.’ Jezebel ama ewet leta ọnọ ẹsọk mbiowo obio ete yak mmọ ẹdori Naboth ikọ ẹte ke osụn̄i Abasi, ẹnyụn̄ ẹtọn̄ọ enye ke itiat ẹwot. Ke ẹma ẹkewot Naboth, enye ama ọdọhọ Ahab ete: ‘Naboth akpa. Afo enyene in̄wan̄ oro idahaemi.’

Idịghe Naboth kpọt ke Jezebel okowot ke unana ntak. Enye ama owot ediwak mbon emi ẹkemade Jehovah. Enye ama okpono nsunsu abasi onyụn̄ anam ndiọi n̄kpọ en̄wen n̄ko. Jehovah ama okụt kpukpru emi. Nso ke Jehovah edinam enye?

Ke Ahab ama akakpa, Jehoram eyen esie ama edi edidem nte ini akakade. Jehovah ama ọdọn̄ owo kiet emi ekekerede Jehu aka ọkọnọ Jezebel ye ubon esie utịp idiọkn̄kpọ mmọ.

Jehu ama awat chariot esie aka Jezreel emi Jezebel okodụn̄de. Jehoram ama awat chariot esie edisobo Jehu onyụn̄ obụp enye ete: ‘Ndi edi ke emem?’ Jehu ama ọbọrọ enye ete: ‘Emem ididụhe adan̄a nte Jezebel eka fo akade iso anam ndiọi n̄kpọ.’ Jehoram ama odomo ndiwọn̄ọde iso mfehe. Edi Jehu ama osio idan̄ atịgha enye owot.

 Jehu ama ebe aka ufọk ubọn̄ Jezebel. Ke ini Jezebel okokopde ke Jehu ke edi, enye ama ọdiọn̄ iso ye idet aka eketie ke mben window ufọkenyọn̄ esie ebet Jehu. Ke Jehu ama ekedisịm, Jezebel ama ọkọm enye ikọ ikọ. Jehu ama ofiori ọdọhọ mme asan̄autom Jezebel emi ẹkedade ẹkpere Jezebel ete: ‘Ẹsio enye ẹduọk ke isọn̄!’ Mmọ ẹma ẹsio Jezebel ke window ẹduọk, enye ama ediduọ ke isọn̄ akpa.

Ekem, Jehu ama anam ẹwot nditọ Ahab irenowo 70 onyụn̄ anam mme owo ẹtre ndikpono Baal ke Israel. Ndi omokụt do ke idụhe se Jehovah mîdiọn̄ọke? Ndi omokụt n̄ko ke enye esinọ mbon emi ẹnamde ndiọi n̄kpọ ufen ke nnennen ini?