De König Ahab wohnt imene Palascht z Jesreel. Vo sim Fenschter us gseht er en Wiigarte, wo em Naboth ghört. De Ahab wett ihm de Wiigarte abchaufe, aber de Naboth isch nid iiverstande. S Gsetz vo Jehova verbietet nämlich, Land z verchaufe, wo mer gerbt het. Und de Naboth wett das mache, wo richtig isch. Findet das de Ahab echt guet? Nei. Er isch eso hässig, dass er eifach im Bett bliibt und nüt meh wett esse.

Em Ahab sini Frau, di bösi Königin Isebel, seit zu ihm: «Du bisch doch de König vo Israel. Du chasch alles ha, wo du wetsch. Ich luege scho, dass du dee Wiigarte überchunnsch.» Drum schribt si Briefe a di Ältischte vo de Stadt, si sölled behaupte, dass de Naboth gege Gott gfluecht heg und si sölled ihn für das steinige. Di Ältischte mached, was d Isebel gseit het. Glii drufabe seit d Isebel zum Ahab: «De Naboth isch tot. Jetzt chasch du de Wiigarte ha.»

De Naboth isch nid de einzig Unschuldig, wo vo de Isebel tötet wird. Si bringt vil Mensche um, wo Jehova gern hend. D Isebel betet au Götze a und macht vil anderi bösi Sache. Jehova gseht das alles. Was meinsch, was wird er gege d Isebel unterneh?

Nachdem de Ahab gstorbe isch, wird sin Sohn, de Joram, König. I dere Ziit git Jehova amene Maa, wo Jehu heisst, de Uftrag, d Isebel und ihri Familie z bestrafe.

De Jehu fahrt mit sim Chriegswage uf Jesreel, dört, wo d Isebel wohnt. De König Joram chunnt ihm mit sim Wage entgege und fragt ihn: «Chunnsch du in Fride?» De Jehu seit: «Es cha gar kei Fride gee, solang dini Muetter, d Isebel, eso schlimmi Sache macht.» Da versuecht de Joram mit sim Wage umzkehre und z flüchte. Aber de Jehu isch schneller, nimmt sin Pfiilboge und verschiesst de Joram.

Nachher fahrt de Jehu zum Palascht vo de Isebel. Wo si ghört, dass er uf em Weg zu ihre isch, schminkt si sich, macht e schöni Frisur und wartet am obere Fenschter. Wo de Jehu achunnt, begrüesst d Isebel ihn ganz unfründlich. De Jehu rüeft zu ihrne Diener, wo nebe ihre stöhnd: «Gheied si abe!» Da gheied si d Isebel usem Fenschter use und si stirbt.

Nach all dem laat de Jehu alli 70 Söhn vom Ahab umbringe. Er macht au, dass d Abetig vom Baal im ganze Land ufhört. Hesch gmerkt, dass Jehova alles gseht und dass er bösi Mensche genau im richtige Moment bestraft?