NUPINPLỌN 49
Ahọsi Ylankan de Yin Yasana
Sọn họ̀nmẹ etọn he tin to Jezleẹli, Ahọlu Ahabi nọ mọ vẹngle dawe de he nọ yin Naboti tọn hlan gbọn fleṣenu. Vẹngle lọ jlo Ahabi, enẹwutu e tẹnpọn nado họ̀ ẹ sọn Naboti si. Ṣigba, Naboti gbẹ́, na e ma sọgbe hẹ Osẹ́n Jehovah tọn nado sà aigba he yè dugu etọn de wutu. Be Ahabi na sisi nudide he Naboti basi nado wà nuhe sọgbe ya? Lala. Homẹgble Ahabi taun. E jẹflumẹ sọmọ bọ e gbọṣi abò etọn mẹ bo gbẹ́ núdùdù.
Asi Ahabi tọn, yèdọ Ahọsi ylankan de he nọ yin Jezebẹli dọna ẹn dọmọ: ‘Hiẹ wẹ yin Ahọlu Islaeli tọn. A sọgan tindo nudepope he jlo we. N’na yí aigba lọ na we.’ Ahọsi lọ sọ kanwehlan mẹho tòdaho lọ tọn lẹ dọ yé ni sawhẹdokọna Naboti dọ e ko zánnu do Jiwheyẹwhe go, podọ yé ni dlan zannu do e hù. Mẹho lọ lẹ wà nuhe Jezebẹli biọ to yé si, enẹgodo Jezebẹli dọna Ahabi dọ: ‘Naboti ko kú. Vẹngle lọ ko lẹzun towe.’
E ma yin Naboti kẹdẹ wẹ yin homẹvọnọ he Jezebẹli hù. E sọ hù mẹsusu devo lẹ he yiwanna Jehovah. E nọ sẹ̀n boṣiọ lẹ bosọ nọ wà nuylankan devo lẹ. Jehovah mọ nuylankan he Jezebẹli ko wà lẹpo. Etẹwẹ e na wà na ẹn?
To okú Ahabi tọn godo, visunnu etọn Jeholami lẹzun ahọlu. Jehovah do dawe de he nọ yin Jehu hlan nado sayana Jezebẹli po whẹndo etọn po.
Jehu kùn osọ́-kẹkẹ etọn yì Jezleẹli, fihe Jezebẹli nọ nọ̀. Jeholami zọ̀n osọ́-kẹkẹ mẹ wá pé Jehu bo kanse e dọmọ: ‘Jijọho mẹ wẹ a ja te ya?’ Jehu dọmọ: ‘Jijọho tẹwẹ sọgan tin dile e na dẹnsọ bọ onọ̀ towe Jezebẹli na to nuylankan lẹ wà.’ Jeholami tẹnpọn nado lilẹ́ osọ́-kẹkẹ etọn bo họnyi. Ṣigba, Jehu de ogá do Jeholami bo hù i.
Enẹgodo, Jehu yì họ̀nmẹ Jezebẹli tọn. Whenue Jezebẹli sè dọ e ja, e sánudo nukunmẹ bo jla oda etọn do bosọ nọte to fleṣenu to aga ohọ̀ etọn tọn. Whenue Jehu wá, Jezebẹli yí hogbe mẹmasi tọn lẹ do pé e. Jehu dawhá hlan devizọnwatọ Jezebẹli tọn he to ote to apá na ẹn lẹ dọmọ: “Mì dlan ẹn do odò!” Yé sọ sisẹ́ Jezebẹli dlan gbọn fleṣenu bọ e flẹ jẹ kọmẹ bo kú.
Enẹgodo, Jehu hù visunnu 70 Ahabi tọn lẹpo bo klọ́ aigba lọ wé sọn sinsẹ̀n-bibasi Baali tọn mẹ. Be a ma mọdọ Jehovah yọ́n nulẹpo bosọ nọ sayana mẹhe to nuylankan wà lẹ to ojlẹ he sọgbe mẹ ya?
“Ogú he yin mimọyi gbọn nukunkẹn dali to bẹjẹeji ma na hẹn dona wá to godo mẹ.”—Howhinwhẹn lẹ 20:21
A Gán Sọ Pọ́n Hosọ Ehelẹ
NUPLỌNMẸWE BIBLU PINPLỌN TỌN LẸ
Jiwheyẹwhe de He Gbẹwanna Whẹdida Mawadodo
Yí nuplọnmẹwe ehe bo pọ́n nuhe a sọgan plọn sọn otàn Ahabi, Jezebẹli, Naboti po Elija po tọn mẹ.
