Halin sa bintana sang palasyo ni Hari Ahab sa Jezreel, makita niya ang ulubasan ni Nabot. Gusto ni Ahab ini nga ulubasan, gani ginhambalan niya si Nabot nga baklon niya ini. Pero wala ini ginbaligya ni Nabot sa iya bangod indi puede ibaligya ang napanubli nga duta suno sa Kasuguan ni Jehova. Ginrespeto bala ni Ahab si Nabot bangod ginhimo niya ang husto? Wala. Naakig gid si Ahab. Naglalain gid sia amo nga wala gid sia naggua sa iya kuarto kag indi na sia magkaon.

Ang malain gid katama nga asawa ni Ahab nga si Rayna Jezebel, nagsiling sa iya: ‘Ikaw ang hari sang Israel. Makuha mo ang bisan ano nga gusto mo. Kuhaon ko ina nga duta para sa imo.’ Nagpadala si Jezebel sang mga sulat sa mga gulang sang siudad, nga nagasiling sa ila nga akusahan si Nabot nga nagpakamalaut sa Dios kag batuhon sia asta mapatay. Ginhimo sang mga gulang ang ginsiling ni Jezebel, dayon ginsilingan ni Jezebel si Ahab: ‘Patay na si Nabot. Imo na ang ulubasan.’

Indi lang si Nabot ang inosente nga tawo nga ginpatay ni Jezebel. Ginpatay man niya ang madamo nga tawo nga nagapalangga kay Jehova. Nagsimba sia sa butig nga mga dios kag naghimo sang iban pa nga malain nga mga butang. Nakita ni Jehova ang tanan nga malain nga ginhimo ni Jezebel. Ano ang himuon ni Jehova sa iya?

Sang napatay si Ahab, nangin hari ang iya bata nga si Jehoram. Ginpadala ni Jehova si Jehu para silutan si Jezebel kag ang iya pamilya.

Nagsakay si Jehu sa iya kangga kag nagkadto sa Jezreel, diin nagaistar si Jezebel. Nagsakay si Jehoram sa iya kangga kag ginsugata niya si Jehu kag ginpamangkot sia: ‘May paghidait bala sa tunga naton?’ Si Jehu nagsabat: ‘Wala gid sing paghidait kon ang imo iloy nga si Jezebel padayon nga nagahimo  sing malain.’ Ginliso ni Jehoram ang iya kangga kag nalagyo. Pero ginpana sia ni Jehu, gani napatay sia.

Nagkadto dayon si Jehu sa palasyo ni Jezebel. Sang nabalitaan ini ni Jezebel, nagpaguapa sia, ginpatahom ang iya buhok, kag naghulat sa bintana sa ibabaw nga panalgan. Sang nag-abot si Jehu, wala niya ini ginrespeto. Gani nagsinggit si Jehu sa mga alagad ni Jezebel nga nagatindog sa tupad niya: “Ihulog ninyo sia!” Ginhulog nila si Jezebel sa bintana, kag napatay sia.

Dayon, ginpatay ni Jehu ang 70 ka bata nga lalaki ni Ahab kag gintinluan ang pungsod sang pagsimba kay Baal. Indi bala nga nahibaluan gid ni Jehova ang tanan nga butang kag silutan niya sa husto nga tion ang mga nagahimo sing malain?