Okuza moruiho rwondjuwo ye youhona moJesreel, Ombara Ahab ya muna otjikunino tjomurumendu wena Nabot. Ahab aa vanga otjikunino hi na kondjo okutjiranda ku Nabot. Posiya Nabot wa panḓa okurandisa ku ye mena rokutja mokutjita nao ma teya Etwako raJehova ndi tjaera okurandisa otjirumatwa tjoye. Hapo Ahab wa raisa ondengero ku Nabot mena rokutja wa tjita otjiṋa otjisemba? Kako, Ahab wa pindikire tjinene ngandu tje hina wa pita metuwo romara, nu eye wa panḓa okurya ovikurya.

Omukazendu waAhab omurunde, Ombara oserekaze yena Isebel wa raera Ahab na tja: ‘Oove ombara yaIsrael. Ove mo yenene okumuna atjihe tji mo vanga. Ami me ku kamburire otjikunino tjo.’ Isebel wa tjanga otutuu kovanene votjihuro e ve raere kutja ngave kuminine Nabot kutja wa senga Mukuru nokutja nga zepwe nomawe. Ovanene va tjita otja Isebel pe ve raera, okuzambo Isebel otja raera Ahab na tja: ‘Nabot wa ṱu, otjikunino otjoye nambano.’

Nabot kari omundu erike omuhinandjo ngwa zepewa i Isebel. Isebel wa zepa ovandu varwe ovengi mba suverere Jehova. Isebel ee rikotamene kovisenginina nu aa tjiti oviṋa vyarwe ovivi. Jehova wa muna oviṋa avihe ovivi Isebel mbyaa tjiti. Nu hapo me mu tjiti vi?

Kombunda yonḓiro yaAhab, omuatje we omuzandu wena Joram ongwa rira ombara. Jehova wa hinda omurumendu wena Jehu okukavera Isebel neṱunḓu re.

Jehu wa hinga etemba re roukambe nai kotjihuro Jesreel, Isebel katurire. Joram we ya metemba re okuyekuhakaena kuna Jehu ne mu pura a tja: ‘Hapo pe nohange pokati ketu?’ Jehu wa tja: ‘Kapena okukara ohange pokati ketu ngunda nyoko e tjita oviṋa ovivi.’ Joram wa kondjisa okutanaura etemba re kutja ma yende. Posiya Jehu we mu veta notjiku nu Joram wa ṱira mbo.

 Okuzambo Jehu wa ya kondjuwo yaIsebel youhona. Indu Isebel tja zuva kutja Jehu me ya, eye we rihwa omiti vyomomurungu nu wa ṱuna ozondjise ze, na haama kombanda poruiho okumuundja. Indu Jehu tja vaza, Isebel we mu korisa momuano omuvi. Jehu wa ravaera kovakarere vaIsebel mba ku ramene meṋe ye na tja: “Yumbeye Isebel pehi!” Owo otji va undurira Isebel pehi okuza moruiho na ṱire mbo.

Kombunda yanao, Jehu wa kazepa ovanatje ovazandu vaAhab 70 na isamo omerikotameneno waBaal mehi. Mo munu nao kutja Jehova u tjiwa oviṋa avihe nokutja moruveze ndu ri rwo, eye ma vere imba mbe tjita oviṋa ovivi?