Ari jenila istana iya ba Jesril, Raja Ahap ulih meda kebun anggur ke diempu orang ke benama Nabot. Ahap dekaka kebun anggur nya, lalu iya nguji deka meli kebun nya ari Nabot. Tang Nabot enggai nyual nya ngagai Ahap laban Adat Jehovah nagang tanah pesaka dijual. Kati Ahap bebasaka Nabot laban udah ngereja utai ti betul? Enda. Ahap amat ringat. Iya amat ringat nyentukka iya enggai pansut ari bilik lalu enggai makai.

Bini Ahap, Kuin Jesebel ke jai, madahka iya: ‘Nuan tu raja menua Israel. Nuan ulih bempuka semua utai ti dikedekaka nuan. Aku deka ngulihka tanah nya ke nuan.’ Iya nulis surat ngagai bala pemesai menua nya, ngasuh sida nuduh Nabot udah nyumpah Petara lalu nuku iya ngena batu nyentukka iya mati. Bala pemesai ngereja utai ke diasuh Jesebel. Udah nya, Jesebel bejaku ngagai Ahap: ‘Nabot udah mati. Alai ambi kebun anggur iya.’

Ukai semina Nabot aja dibunuh Jesebel. Iya munuh mayuh orang ke rinduka Jehovah. Iya nyembah patung lalu ngereja mayuh utai ti jai. Jehovah meda semua utai jai ke dikereja Jesebel. Nama ke deka dikereja Jehovah ngagai iya?

Udah Ahap mati, anak iya Joram nyadi raja. Jehovah nganjung seiku lelaki ke benama Jehu kena ngukum Jesebel sebilik.

Jehu nepan kerita perang iya ngagai Jesril, endur Jesebel diau. Joram datai enggau kerita perang lalu nanya Jehu: ‘Kati bisi pemaik entara kitai?’ Saut Jehu: ‘Seagi-agi indai nuan Jesebel agi ngereja pengawa jai, deka nadai pemaik entara kitai.’ Joram nguji nguingka kerita perang iya lalu ngerarika diri. Tang Jehu nimbak laja ngagai iya, lalu Joram mati.

 Udah nya, Jehu mansang ngagai istana Jesebel. Lebuh Jesebel ninga Jehu deka datai, iya ngias diri, ngaduka buk iya lalu nganti ba jenila. Lebuh Jehu datai, Jesebel ngangauka iya enggau kasar. Jehu ngasuh bala pemesai Jesebel ti bediri semak Jesebel: “Buai indu nya ke baruh kitu!” Sida ngeju Jesebel ari jenila. Iya labuh ke baruh lalu mati.

Pengudah nya, Jehu munuh 70 iku anak lelaki Ahap lalu meresika menua nya ari sembah Baal. Ulih nuan meda Jehovah nemu semua utai lalu ba maya ti ngena, Iya ngukum orang ke ngereja utai ti jai?