Iti tawa ti palasio ni Ari Acab idiay Jezrael, makitkitana ti kaubasan ti lalaki nga agnagan Nabot. Kayat ni Acab a maala dayta a kaubasan isu a pinadasna a gatangen ken Nabot. Ngem saan a kayat ni Nabot nga ilako ta iparit ti Linteg ni Jehova nga ilako ti maysa ti tawidna a daga. Rinespeto kadi ni Acab ni Nabot gapu ta inaramidna ti husto? Saan. Permi ti unget ni Acab. Kasta unay ti lidayna nga uray la dinan kayat ti rummuar iti kuartona ken dinan kayat ti mangan.

Imbaga kenkuana ti dakes nga asawana a ni Reyna Jezebel: ‘Sika ti ari ti Israel. Maalam ti amin a kayatmo. Alaek dayta a daga para kenka.’ Sinuratanna dagiti lallakay iti siudad ket imbagana nga akusaranda ni Nabot nga inlunodna ti Dios sa uborenda agingga a matay. Inaramid dagiti lallakay ti imbaga ni Jezebel. Kalpasanna, imbaga ni Jezebel ken Acab: ‘Natayen ni Nabot. Kukuamon ti kaubasan.’

Saan la a ni Nabot ti nasingpet a tao a pinatay ni Jezebel. Adu pay a tattao a mangay-ayat ken Jehova ti pinatayna. Nagdaydayaw ni Jezebel kadagiti imahen, ken adu pay ti dakes nga inaramidna. Nakita ni Jehova amin dagita. Ania ti aramidenna ken Jezebel?

Idi agangay, natay ni Acab. Kalpasan ti sumagmamano a tiempo, nagbalin nga ari ti anakna a ni Jehoram. Imbaon ni Jehova ti lalaki a ni Jehu a mangdusa ken Jezebel ken iti pamiliana.

Nagsakay ni Jehu iti karuahena ket napan idiay Jezrael, a paggigianan ni Jezebel. Naglugan met ni Jehoram iti karuahe tapno sabatenna ni Jehu. Insaludsod ni Jehoram: ‘Kappia kadi ti rason nga immayka?’ Insungbat ni Jehu: ‘Awan ti kappia agingga nga agar-aramid ni Jezebel nga inam  kadagiti dakes a bambanag.’ Pinadas ni Jehoram ti aglibas, ngem pinana ni Jehu ket natay.

Idi kuan, napan ni Jehu iti palasio ni Jezebel. Idi naammuan ni Jezebel nga um-umay ni Jehu, nag-makeup, inurnosna ti buokna, ken naguray iti tawa. Idi addan ni Jehu, nagdakes ti imbaga ni Jezebel kenkuana. Impukkaw ni Jehu kadagiti adipen a nakatakder iti abay ni Jezebel: “Itinnagyo!” Intinnagda ni Jezebel iti tawa, ket natay.

Kalpasanna, pinatay ni Jehu ti 70 nga annak a lallaki ni Acab ken pinagpatinggana ti panagdaydayaw ken Baal idiay Israel. Saan kadi nga ipakita dayta nga ammo ni Jehova ti amin ken dusaenna dagiti agar-aramid iti dakes iti umiso a tiempo?