Hkawhkam Ahab gaw Yezrela mare kaw nga ai hkawhkam htingnu hkuwawt chyinghka kaw nna, Nabot ngu ai masha a tsabyi sun hpe yu nga ai. Ahab gaw dai tsabyi sun hpe ra marin wa nna, mari mayu ai lam Nabot hpe tsun ai. Raitim, Nabot gaw n dut ya ai. Hpa majaw nga yang, sali wunli lu da ai lamu ga hpe n mai dut ai ngu, Yehowa a tara hta hkang da ai majaw re. Jaw ai hku Nabot dawdan ai hpe Ahab hkap la wa ai kun? N hkap la ai. Ahab gaw grai masin pawt wa ai. Grai yawn nna, n lu n sha ai sha yup ra kaw sha nga mat ai.

N hkru ai hkawhkam jan Yezebela gaw shi a madu wa Ahab hpe ndai hku tsun ai: ‘Nang gaw Israela hkawhkam re. Nang la mayu ai yawng hpe la mai ai. Dai lamu ga hpe nang lu hkra ngai galaw ya na.’ Dai hpang, Yezebela gaw mare agyi salang ni hpang de laika ka ai. Karai Kasang hpe dagam dala ga ni tsun ai wa re ngu Nabot hpe nanhte mara shagun nna, nlung hte kabai sat kau mu ngu hkang dat ai. Shi tsun ai hte maren mare agyi salang ni galaw ma ai. Dai hpang, Yezebela gaw Ahab hpe ndai hku tsun ai: ‘Nabot si mat sai. Tsabyi sun gaw na a sun rai mat sai.’

Yezebela sat wa ai masha ni hta, mara n nga ai gaw Nabot langai sha n re. Yehowa hpe tsawra ai masha law law hpe mung shi sat wa ai. Shi gaw gawng ngu sumla ni hpe nawku nna, n kaja ai lam ni hpe mung galaw ai. Yehowa gaw Yezebela galaw ai n kaja ai lam yawng hpe mu ai. Dai majaw, shi hpe Yehowa hpa galaw na kun?

Ahab si mat ai hpang, shi kasha Yehoram gaw hkawhkam byin wa ai. Yehowa gaw Yezebela hte shi a dinghku hpe ari jaw na matu Yehu ngu ai masha hpe shangun dat ai.

Yehu gaw Yezebela nga ai Yezrela mare de, hpyen gumra leng jawn nna sa wa ai. Hkawhkam Yehoram mung hpyen gumra leng jawn let sa wa ai. Yehu hpe mu yang: ‘Ngwi pyaw nga ai kun?’ nga nna san ai. ‘Na kanu Yezebela n hkru n kaja ai lam ni galaw nga dingyang, gara hku nna ngwi pyaw lu na ta?’ nga nna Yehu bai tsun ai. Dai majaw, Yehoram gaw shi a gumra leng hte hprawng na matu shakut ai. Raitim,  Yehu gap dat ai pala gaw shi hpe hkra mat ai majaw si mat ai.

Dai hpang, Yehu gaw Yezebela nga ai hkawhkam htingnu de sa mat ai. Dai lam hpe Yezebela na yang, myi man hte kara ni hpe shakya la nna, ntsa htap kaw nga ai hku wawt chyinghka hta la nga ai. Yehu du wa ai shaloi, Yezebela gaw shi hpe grai zai ai hku tsun shaga ai. Yehu gaw Yezebela makau hta tsap nga ai mayam ni hpe ndai hku marawn tsun dat ai: “Shi hpe kanawng jahkrat dat mu!” Shanhte mung Yezebela hpe hkuwawt chyinghka kaw nna, kanawng jahkrat dat ai majaw ga de hkrat nna si mat ai.

Dai hpang, Yehu gaw Ahab a shadang sha 70 hpe sat nna mungdan hta nga ai Bala nawku dawjau ai lam hpe yeng seng kau ai. Yehowa gaw yawng mayawng hpe mu lu nna, aten du jang n hkru n kaja ai lam galaw ai ni hpe ari jaw ai lam anhte chye lu ai.