Mũthamaki Ahabu arĩ Jezireeli ndirica-inĩ ya nyũmba yake, nĩ onaga mũgũnda wa mĩthabibũ wa mũthuri wetagwo Nabothu. Ahabu nĩ eendaga mũgũnda ũcio na nĩ eerire Nabothu amwenderie. No Nabothu nĩ aaregire kũmwenderia tondũ rĩarĩ igai rĩake, na gwĩka ũguo nĩ kũngĩatũmire oine Watho wa Jehova. Hihi Ahabu nĩ aaheire Nabothu gĩtĩo nĩ ũndũ wa gwĩka ũrĩa kwagĩrĩire? Aca. Ahabu nĩ aarakarire mũno nginya agĩthiĩ agĩkoma na akĩrega kũrĩa irio.

Mũtumia wake wetagwo Jezebeli ũrĩa warĩ mwaganu mũno, aamwĩrire ũũ: ‘Na githĩ wee tiwe Mũthamaki wa Isiraeli. Wagĩrĩirũo kuoya kĩrĩa gĩothe ũrenda. Niĩ nĩ niĩ ngũkũhe mũgũnda ũcio.’ Aandĩkĩire athuri a itũũra marũa akĩmeera mathitange Nabothu atĩ nĩ aarumĩte Ngai na mamũhũũre na mahiga nginya akue. Athuri acio nĩ meekire ũrĩa Jezebeli aamerĩte, na thutha ũcio Jezebeli akĩra Ahabu ũũ: ‘Nabothu nĩ mũkuũ. Mũgũnda nĩ waku rĩu.’

Nabothu towe tu mũndũ ũrĩa woragĩtwo atarĩ na mahĩtia, no nĩ kwarĩ na andũ aingĩ mũno meendete Jehova moragĩtwo nĩ Jezebeli. Jehova nĩ onaga maũndũ marĩa mothe moru Jezebeli eekaga. Angĩamwĩkire atĩa?

Thutha wa Ahabu gũkua, mũrũwe Jehoramu nĩwe watuĩkire mũthamaki. Jehova nĩ aatũmire mũndũ wetagwo Jehu athiĩ akaherithie Jezebeli na famĩlĩ yake.

Jehu nĩ aathire na ngari yake ya mbarathi nginya Jezireeli kũrĩa Jezebeli aaikaraga. Jehoramu nĩ aahaicire ngari yake ya mbarathi agĩthiĩ gũtũnga Jehu, na akĩmũũria ũũ: ‘Kwĩ na thayũ?’ Nake Jehu akĩmũcokeria: ‘Gũtingĩgĩa na thayũ mami wanyu agĩkaga mĩtugo mĩũru  ũguo.’ Jehoramu nĩ aageririe kũgarũra ngari yake nĩguo ore, no Jehu akĩmũratha na mũguĩ na agĩkua.

Jehu aacokire agĩthiĩ kwa Jezebeli. Rĩrĩa Jezebeli aaiguire atĩ Jehu aarĩ njĩra agĩthiĩ gwake, eegemirie maitho, agĩthondeka njuĩrĩ, agĩcoka agĩikara ndirica-inĩ. Rĩrĩa Jehu aakinyire, Jezebeli aamũgeithirie na kĩnyũrũri. Jehu aanĩrĩire akĩra ndungata cia Jezebeli ũũ: ‘Mũikiei agũe thĩ!’ Maamũnyitire na makĩmũikĩria ndirica-inĩ akĩbacana thĩ na agĩkua.

Thutha ũcio Jehu nĩ oragire ariũ 70 a Ahabu na agĩtheria bũrũri ũcio kuumana na ũhoi wa Baali. Hihi nĩ wona atĩ Jehova nĩ amenyaga maũndũ mothe na hĩndĩ ĩrĩa yagĩrĩire yakinya nĩ aherithagia arĩa mekaga maũndũ moru?