Kioso kia kexile bhu njanela ia inzo iê mu Jizeleiele, o Sobha Akabe ua muene dibhia dia mivide dia tokalele ku diiala a muixana Nabote. Akabe ua mesenene o dibhia didi, iu ua mesenene ku di sumba kua Nabote. Maji Nabote ka xikina kusumbisa o dibhia, mukonda mu Kitumu kia Jihova kiexile kituxi, ku sumbisa o mavu a undundu. O kuila Akabe ua belesela Nabote, mu kubhanga o kima kia beta o kota? Kana. Akabe njinda ia mu kuatele. Muene ua luualele kiavulu, katé muene ka mesenene kutunda bhu hama iê, ka kexile dingi mudia.

O muhatu uaiibha ua Akabe, Nvuale Jezabele, ua mu tangela: ‘Eie o sobha ia Izalaiele. Eie u tena kukala ni kima kioso kioso, ki ua mesena. Eme nga-nda bhanga ioso phala ku ku bhana o dibhia diodio.’ Muéne ua soneka mukanda phala o adiakime mu mbanza, phala ku tatela Nabote kuila, ua zuelele ima iaiibha kua Nzambi, ni ku mu buba ni matadi katé kieji fua. O adiakime a bhange kála kia tumine Jezabele, Jezabele anga ua tangela muadi uê Akabe, uixi: ‘Nabote uafu kiá! Mu kiki o dibhia dia mivide dia-nda kala dié.’

Nabote ki muene ngó o muthu uambote a mu jibhile kuala Jezabele kana. Jezabele ua jibhile abhezi avulu a Jihova. Muéne ua kexile mu bheza iteka ni kubhanga ima iengi iaiibha. Jihova ua kexile mu mona o ima ioso iaiibha ia kexile mu bhanga Jezabele. Ihi ieji bhanga Jihova kua Jezabele?

Kioso Akabe kiafu, o mon’ê Jolá, ua bhingana bhu kididi kiê kala sobha. Jihova ua tumikisa Jehu phala kujibha Jezabele ni muiji uê.

Jehu ua sambela ku dikalu diê katé mu mbanza ia Jizeleiele, o kididi mua tungile Jezabele. Jolá uai ni dikalu diê, phala ku disanga ni Jehu iu ua muibhudisa uixi: ‘Saí kutululuka mudietu?’ Jehu ua  tambuijila: ‘Kiebhi kia-nda kala kutululuka, se mam’enu Jezabele ua kolokota mu kubhanga o ima iaiibha?’ Jolá ua mesenene kulenga ni dikalu diê. Maji Jehu ua mu jibha ni mufula.

Mu kusuluka, Jehu uai katé mu mbonge ia Jezabele. Kioso muéne kievu kuila Jehu ua kexile mu kuíza, ua dipindala kiambote o mesu ni pholo, ua samuna o ndemba iú ua kexile mu mu kingila kuthandu dia inzo iê bhu njanela. Kioso Jehu kia bhixila, muéne ua mu menekena mu ukexilu uaiibha. Jehu ua tumina ku jiselevende ja Jezabele: ‘Mu takulienu bhoxi!’ Ene a takula Jezabele bhu njanela, ua bu bhoxi iú uafu.

Mu kusuluka, Jehu ua jibha 70 a tuana tua Akabe, iú ua zelesele o ixi ioso mu ubhezelu ua Bahale. U tena kumona kuila Jihova uejiia o ima ioso, ni kuila mu kithangana kia tokala, muéne u kaxtikala o athu a bhanga o ima iaiibha?