Masaa Ehabi ndoo loŋnuŋ o ndu lo chiɛiniŋ Chɛsiluɛɛ, mbo che kpele Nabɔti wo o wundɛi ndɔɔ. Ehabi ndoo yeema kpeloo hoo. Le hei, mbo kindiŋ le mbo pendu ndu Nabɔti o ba. Kɛ mi Nabɔti kɛɛ le ndu kpeloo hoo pisioo o ba, kanifuule Sawa Chɛhowaa ndoo dimi maa wana pisi lɛŋnde cho le yuŋgoo leŋ te. Baa mi Ehabi ndoo chɔm pa bɛɛleŋ le mɛɛ Nabɔti kɛɛ le ndu kpeloo pisioo o ba yɛ? Sako bɛɛ. Mi Ehabi tuulu kɔl tau. Mɛɛ o tuulu kɔl tei, mbo kɛɛ le fulaa o lumui ndɔɔ niŋ, nduyɛ mbo kɛɛ le nyɛdiaa dioo.

Wana dɛnɛ wɔɔŋndo lanɔɔ Ehabi wa ni. Diola ndɔlaŋ la wa Chɛsibɛɛ ni. Mbo dimul pɔnɔ ndɔ aa: ‘Num cho masaa le Isɔluɛi ni. A tiuba ma sɔla nyɛ o nyɛ ŋ yeema pɛ. I cho tosa ma sɔla lɛŋnde leŋ.’ Okoŋ, mbo poonyiaa yaulaŋ o bɛnduaa chieeya lo, mbo dimul nda maa a nyiinduu Nabɔti choolaŋ choo maa o yei Mɛlɛka, okoŋ ma vii vii ndu a poutaŋ ma dii ndu. Mi bɛnduaa chieeya haa tosa nyɛ Chɛsibɛɛ dimul nda le tosaa wo. Okoŋ, mi Chɛsibɛɛ dimul Ehabi aa: ‘Nabɔti sɔla piɔmndo. Num nɔ niŋ kpele ndɔɔ ni.’

O cho ko Nabɔti le Chɛsibɛɛ dii le. Kɛ mbo diu diu wanaa bɔɔbɔɔ ndaa kaala Chɛhowa wa. Piɔmnda Chɛsibɛɛ ndoo sooluu ni, nduyɛ mbo tosa sɔɔŋ wɔɔŋ cheleŋ. Mi Chɛhowa cha sɔɔŋ wɔɔŋ Chɛsibɛɛ wa tosaa woŋ kpou. Yɛɛ ndoo nɔ yɛ niko mbo tosa a ndu?

Mɛɛ Ehabi vi, mi po ndɔɔ Chɛholuam simnuŋ masaa. Mi Chɛhowa viam Chɛhu le mbo kɔ tusi Chɛsibɛɛ a yuŋgu ndɔɔ nyɛpalaa choo.

Mi Chɛhu luɛi o nyɛ ndɔ nyaanaŋ suaa naŋndo niŋ, le kɔlaŋ Chɛsiluɛɛ, naa Chɛsibɛɛ wa wa. Mi Chɛholuam bɛɛ luɛi o nyɛ ndɔ nyaanaŋ suaa naŋndo niŋ, ma bɔŋaŋ nda Chɛhu. Okoŋ mbo nyuna ndu aa: ‘Baa kɔl nyuloo cho naa pa tɛɛŋ?’ Mi Chɛhu dimul ndu aa: ‘Te kala num wa pɛ hiouwɔɔ lachi a sɔɔŋ wɔɔŋndoŋ tosaa, kɔl nyulu o kɔl  nyulu cho naa tɛɛŋ te.’ Mi Chɛholuam kindiŋ le nyɛ ndɔ nyaanaŋ suaa naŋndo mulioo mbo kuɛŋnuŋ. Kɛ mi Chɛhu via ndu a chiŋɔleŋ, mbo wu.

Okoŋ, mi Chɛhu kua o chiɛi lemasa Chɛsibɛɛ wo. Mɛɛ Chɛsibɛɛ tuei maa Chɛhu cho hunɔɔ o ndu lo, mbo suunuŋ nyɛm kɛvɛlɛŋ waŋ laanduaa suunuŋ ndoŋ, mbo toosiaa yiiŋii nduɛi, mbo chal ndu chumndo o chiɛi choo choo wo o wundɛiyo. Mɛɛ Chɛhu fuuluu, mi Chɛsibɛɛ yil ndu o yoŋgaa niŋ. Nduyɛ Chɛsibɛɛ yɛ, buɛiyaa nduaa apum wa ndu ikɛi. Mi Chɛhu deŋul nda aa: “La nyindu ndu!” Ma nyindu Chɛsibɛɛ o wundɛiyo, mbo del lɛŋ, mbo wu.

Okoŋ kɔɔli, mi Chɛhu dii puaa Ehabi wa ŋwaŋ 70. Nduyɛ mbo tosa mi waŋnda pɛŋgi Baal sooluuwo o lɛŋnde Isɔluɛileŋ niŋ. A sina pa maa Chɛhowa sina nyɛ o nyɛ, nduyɛ maa a teleŋ bɛnda wo kinɛi, mbo tusi wanaa tosa sɔɔŋ wɔɔŋndoŋ nda nyɛpalaa choo?