တၢ်မၤလိ ၄၉
နီၢ်ပၤမုၣ်လၢအအၢအသီတဂၤ ဘၣ်တၢ်စံၣ်ညီၣ်
ဖဲစီၤပၤအၤဃာ်ဆၢထၢၣ်ဝဲလၢ အနီအပဲတရီဖိအမဲာ်ညါလၢ ဝ့ၢ်ယံးစရ့လးအပူၤန့ၣ် အဝဲကထံၣ်စိဝဲ စီၤနၤဘိးအစပံးလီၢ်လီၤ. စီၤအၤဃာ်န့ၣ် အဲၣ်ဒိးန့ၢ်ဝဲစပံးလီၢ်အံၤ အဃိအဝဲဃ့ပှ့ၤဝဲလၢ စီၤနၤဘိး အအိၣ်လီၤ. ဘၣ်ဆၣ် စီၤနၤဘိးတဆါန့ၢ်စီၤအၤဃာ်ဘၣ်, မ့ၢ်လၢယဟိဝၤယွၤအတၢ်သိၣ်တၢ်သီအိၣ်ဝဲလၢ ဟီၣ်ခိၣ်လီၢ်လၢပှၤန့ၢ်သါဝဲန့ၣ် ပှၤတဘၣ်ဆါအီၤဘၣ်. ခီဖျိလၢ စီၤနၤဘိးဒိကနၣ် ယွၤအတၢ်သိၣ်တၢ်သီအဃိ မ့ၢ်စီၤအၤဃာ်ပာ်ကဲအီၤဧါ. တပာ်ကဲဝဲဘၣ်. စီၤအၤဃာ်သးထီၣ်တၢ်ဖးဒိၣ်လီၤ. ဒီးစီၤအၤဃာ် အသးဘၣ်ဒိဝဲဒိၣ်မး တုၤလၢ အတဟးထီၣ်လၢအဒၢးပူၤ ဒီးတအီၣ်တၢ်အီတၢ်လၢၤဘၣ်.
နီၢ်ပၤမုၣ်အံၤစ့ဘ့ၤလးလၢအမ့ၢ် စီၤအၤဃာ်အမါလၢအအၢအသီတဂၤအံၤတဲဘၣ်အီၤလၢ– ‘နမ့ၢ်ပှၤအံၣ်စရ့လးဖိအစီၤပၤလီၤ. တၢ်လၢနအဲၣ်ဒိးန့ၣ် နကဘၣ်န့ၢ်လီၤ. စပံးလီၢ်လၢနအဲၣ်ဒိးန့ၢ်န့ၣ် ယကမၤန့ၢ်နၤလီၤ.’ နီၢ်အံၤစ့ဘ့ၤလးကွဲးလံာ်ဆူ ပှၤသူၣ်က့သးပှၢ်တဖၣ်အအိၣ်လီၤ. ဒီးနီၢ်အံၤစ့ဘ့ၤလးမၤလိာ်အဝဲသ့ၣ်လၢ သုကဘၣ်ပာ်တၢ်ကမၣ်လၢ စီၤနၤဘိးအလိၤ လၢအဝဲဆိၣ်အၢကစၢ်ယွၤ, ဝံၤဒီး သုကဘၣ်ကွံာ်သံအီၤလၢလၢၢ်လီၤ. ဒီးပှၤသူၣ်က့သးပှၢ်တဖၣ် မၤဝဲဒ်နီၢ်အံၤစ့ဘ့ၤလး မၢအဝဲသ့ၣ်အသိးလီၤ. လၢခံ နီၢ်အံၤစ့ဘ့ၤလးတဲဘၣ်စီၤအၤဃာ်လၢ– ‘စီၤနၤဘိးသံလံ. စပံးလီၢ်န့ၣ် ကဲထီၣ်နတၢ်လံ.’
နီၢ်အံၤစ့ဘ့ၤလး တမၤသံ စီၤနၤဘိးထဲတဂၤဧိၤဘၣ်. အဝဲမၤသံစ့ၢ်ကီး ပှၤအါဂၤလၢအအဲၣ်ယဟိဝၤယွၤလီၤ. အဝဲဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်တဖၣ် ဒီးမၤဝဲတၢ်အၢတၢ်သီလၢအဂၤစ့ၢ်ကီးလီၤ. တၢ်အၢတၢ်သီလၢနီၢ်အံၤစ့ဘ့ၤလးမၤဝဲတဖၣ်န့ၣ် ယဟိဝၤယွၤထံၣ်ဝဲခဲလၢာ်လီၤ. လၢတၢ်န့ၣ်အဃိ ယဟိဝၤယွၤကမၤဝဲဒ်လဲၣ်.
ဖဲစီၤအၤဃာ်သံဝံၤအလီၢ်ခံ အဖိခွါစီၤယဟိရၣ်ကဲထီၣ်စီၤပၤလၢအလီၢ်လီၤ. ယဟိဝၤယွၤဆှၢလီၤဝဲ ပိာ်ခွါတဂၤလၢ အမံၤမ့ၢ်စီၤယ့ၤဟူလၢ ကလဲၤစံၣ်ညီၣ်ဝဲနီၢ်အံၤစ့ဘ့ၤလး ဒီးအဟံၣ်ဖိဃီဖိလီၤ.
စီၤယ့ၤဟူ ဒိးထီၣ်ဝဲအလ့ၣ်ကဟၣ် ဒီးလဲၤဝဲဆူ ဝ့ၢ်ယံးစရ့လးလၢ အမ့ၢ်နီၢ်အံၤစ့ဘ့ၤလး အိၣ်တၢ်လီၢ်လီၤ. စီၤယဟိရၣ်စ့ၢ်ကီး ဟဲဒိးဝဲလ့ၣ်ကဟၣ် ဒ်သိးကလဲၤသဂၢၢ်ဝဲ စီၤယ့ၤဟူအခိၣ်န့ၣ်လီၤ. ဒီးစီၤယဟိရၣ် တဲဘၣ်စီၤယ့ၤဟူလၢ– ‘မ့ၢ်တၢ်ဃူတၢ်ဖိးအိၣ်လၢ ပဘၢၣ်စၢၤဧါ.’ စီၤယ့ၤဟူတဲဘၣ်အီၤလၢ– ‘နမိနီၢ်အံၤစ့ဘ့ၤလး မ့ၢ်မၤဒံးတၢ်အၢတၢ်သီန့ၣ် တၢ်ဃူတၢ်ဖိးအိၣ်ထီၣ်လၢ ပဘၢၣ်စၢၤ
တသ့ဘၣ်.’ စီၤယဟိရၣ်ဂုာ်ကျဲးစၢး ဃၣ်တရံး အလ့ၣ်ကဟၣ်အခိၣ် ဒ်သိးကဃ့ၢ်ကွံာ်ဝဲလၢအယံၤလီၤ. ဘၣ်ဆၣ် စီၤယ့ၤဟူခးအီၤလၢချံၣ်ဒီး စီၤယဟိရၣ်သံဝဲလီၤ.ဝံၤဒီး စီၤယ့ၤဟူလဲၤဝဲဆူ နီၢ်အံၤစ့ဘ့ၤလးအနီလီၤ. ဖဲနီၢ်အံၤစ့ဘ့ၤလးနၢ်ဟူဝဲလၢ စီၤယ့ၤဟူဟဲဝဲအခါ အဝဲက့ၤဖှူထီၣ်အမဲာ်, မၤဂ့ၤထီၣ်အခိၣ်ဆူၣ် ဒီးလဲၤအိၣ်ခိးအီၤလၢ အဟံၣ်ဖီခိၣ်အပဲတရီဖိအကပၤလီၤ. ဖဲစီၤယ့ၤဟူဟဲတုၤဝဲအခါ နီၢ်အံၤစ့ဘ့ၤလးတဲဆဲးအဲးအီၤလီၤ. စီၤယ့ၤဟူကိးပသူထီၣ်ဆူ နီၢ်အံၤစ့ဘ့ၤလး အပျဲၢ်တဖၣ်အအိၣ်လၢ– ‘တၢၤလီၤကွံာ် နီၢ်အံၤစ့ဘ့ၤလးလၢ ဟီၣ်ခိၣ်လိၤ.’ တဘျီဃီန့ၣ် အဝဲသ့ၣ်ဆီၣ်လီၤတဲာ်နီၢ်အံၤစ့ဘ့ၤလးလၢ ပဲတရီဖိအချၢဒီး နီၢ်အံၤစ့ဘ့ၤလးလီၤတဲာ်သံလၢဟီၣ်ခိၣ်လိၤလီၤ.
ဝံၤဒီး စီၤယ့ၤဟူမၤသံဝဲ စီၤအၤဃာ်အဖိခွါအဂၤ ၇၀ ဒီးမၤလီၤမၢ်ကွံာ်ဝဲဘဧၤလး အတၢ်ဘူၣ်တၢ်ဘါလၢ ကီၢ်အံၣ်စရ့လးအပူၤလီၤ. ခီဖျိလၢတၢ်ဂ့ၢ်အံၤအဃိ ပထံၣ်ဘၣ်လၢ ယဟိဝၤယွၤသ့ၣ်ညါတၢ်ခဲလၢာ် ဒီးဖဲအဆၢကတီၢ်မ့ၢ်ဘၣ်န့ၣ် အဝဲကစံၣ်ညီၣ်ဝဲပှၤလၢ အမၤတၢ်အၢတၢ်သီလီၤ.
“ပှၤန့ၢ်ဘၣ် တၢ်အစုလီၢ်အခီၣ်ခိၣ်ချ့ချ့ လၢအခီၣ်ထံး [လၢတၢ်သးကွံအဃိ] ဘၣ်ဆၣ်ဒီး, အကတၢၢ်န့ၣ်တဘၣ်ဘၣ်တၢ်ဆိၣ်ဂ့ၤဘၣ်.”—ကတိၤဒိ ၂၀:၂၁