Tzmax ttziʼ tventan toj ja te kawbʼil toj Jezreel, aju aj kawil Acab in noktoq tqʼoʼn twitz tiʼj tqan t-uva jun xjal aju Nabot tbʼi. Tajtoq txʼotxʼ lu ex ok tilel tuʼn tuʼn ttzaj tlaqʼoʼn tukʼil Nabot. Noqtzun tuʼnj, nya tajtoq Nabot tuʼn t-xi tkʼayin tuʼnju in tzaj tqʼamaʼntoq Tley Jehová qa nya bʼaʼntoq tuʼn t-xi kʼayit txʼotxʼ in tzaj kyqʼoʼn tatbʼaj te tetzbʼil jun kʼwaʼl. Kubʼ tbʼinchaʼn Nabot aju bʼaʼn. ¿Bʼaʼnpetzulo ela toj twitz Acab aju kubʼ t-ximen Nabot? Nya bʼaʼn. Tzajxix tqʼoj Acab. Tuʼn jlu, nya tajtoq tuʼn tetz toj tkwart ex nya tajtoq tuʼn twaʼn.

Nya bʼaʼntoq t-xuʼjil Acab, aju reina Jezabel. Xi tqʼamaʼn jlu te: «Aya in kawin kyibʼaj aj Israel, jaku ten tkyaqilju tajbʼila. Tzul qʼoʼn txʼotxʼ lu weye ex kxel nqʼoʼne teya». Kubʼtzun ttzʼibʼin junjun uʼj kye tij xjal toj tnam. Kyoj uʼj lu xi tqʼamaʼn tuʼn t-xi qʼamaʼn nya ax tok yol tiʼj Nabot qa otoq yolin nya bʼaʼn tiʼj Dios ex yajxitl tuʼn tkubʼ kybʼyoʼn tukʼil abʼj. Bʼant kyuʼn qe tij xjal tkyaqilju xi tqʼamaʼn Jezabel kye. Yajxitl, xi tqʼamaʼn jlu te Acab: «Ma kyim Nabot. Jaku tzʼoka te tajaw tqan t-uva».

Nya oʼkx tbʼanel xjal Nabot kubʼ tbʼyoʼn Jezabel. Ax ikx e kubʼ tbʼyoʼn txqantl xjal aʼyeju kʼujlaʼntoq Jehová kyuʼn. Nya oʼkxju, ax ikx in kʼulintoq kywitz tilbʼilal ex in bʼanttoq nim tiʼchaq nya bʼaʼn tuʼn. Ok tqʼoʼn twitz Jehová tiʼj tkyaqilju nya bʼaʼn lu. ¿Tiʼtoq kbʼantel tuʼn Jehová tiʼj Jezabel?

Tej tkyim Acab, ikʼ chʼintl ambʼil ex xi tzyet tuʼn tkawin tkʼwaʼl, aju Jehoram tbʼi. Tzajtzun tsamaʼn Jehová jun xjal Jehú tbʼi tuʼn tkubʼ tqʼoʼn tkastiw Jezabel ex qe toj tja.

Jax Jehú toj tkʼuxbʼil ex xiʼ toj Jezreel, atz jatumel najlitoq Jezabel. Ax ikx te Jehoram jax toj tkʼuxbʼil ex xiʼ yolil tukʼil Jehú. Tej tok tkeʼyin, xi tqanin Jehoram jlu te: «¿Atpe mujbʼabʼil qxol?». Xi ttzaqʼweʼn Jehú: «Mlayx ten mojbʼabʼil  qxol akux in kubʼ bʼinchaʼn ttxuʼya Jezabel nya bʼaʼn». Oktzun tilel tuʼn Jehoram tuʼn tmeltzʼaj tukʼil tkʼuxbʼil tuʼn tkubʼ toj bʼe, noqtzun tuʼnj, xi t-xoʼn Jehú jun plech tiʼj ex bʼiʼx kyim.

Yajxitl, xiʼ Jehú toj ja jatumel in kawin Jezabel. Tej tok tbʼiʼn Jezabel qa chʼixtoq tpon Jehú, ok tqʼoʼn tkʼaʼ twitz ex ttziʼ, bʼaj t-xyebʼin twiʼ ex yon ttziʼ ventan toj tkabʼ kol ja. Tej tpon Jehú, xi qʼolbʼen Jezabel te tukʼil nya bʼaʼn yol. Xi ẍchʼin Jehú kyiʼj majen ateʼtoq ttxlaj Jezabel: «¡Kyxoʼnkutze!». Etztzun kyxoʼn ttziʼ ventan, ex kutz tzʼaq xuʼj lu ex kyim.

Tej otoqxi bʼaj jlu, kubʼ tbʼyoʼn Jehú qeju 70 tkʼwaʼl Acab ex el tiʼn kʼulbʼil te Baal. ¿In nel tnikʼa tiʼj jlu? Ojtzqiʼn tkyaqil tuʼn Jehová ex toj ambʼil bʼaʼn toj twitz in kubʼ tqʼoʼn kykastiw qeju in kubʼ kybʼinchaʼn nya bʼaʼn.