Lyonsi lino Umwene Aabu ali umwi sano lyakwe umu Yezileele, nga walolekesya pi windo, walolanga icalo ca matingi ca monsi umwi uwi izina lyakuti Naboti. Aabu walondesyanga icalo cii ca matingi, fwandi waneenyile Naboti ukuti amukazye. Lelo Naboti wakaanyile ukumukazya pa mulandu wakuti isunde lyalesizye ukukazya ica upyanyi. Uzye Aabu wacindike vino Naboti wapingwile ukucita icintu cisuma? Awe. Aabu wasosile sana. Wasosile icakuti ataafumile nu umu muputule muno walaalanga nupya wakanyile nu kulya.

Namwene Yezebele umuci wakwe Aabu uwali ni miyele iipe, wamuneenyile ati: ‘Wewe umwene uwa mu Izlaeli. Ungakwata icili consi cino ukulonda. Ndakupokela impanga iya.’ Walemvile makalata uku ikolo ya mu musumba nu kuyaneena ukuti yapeele Naboti umulandu wa kutipwila Leza, nupya yamutame na mawe mpaka afwe. Aikolo ya mu musumba yacisile vino Yezebele wayaneenyile ukucita, nupya Yezebele waneenyile Aabu ati: ‘Naboti aatafwa. Icalo ca matingi icako.’

Naboti asi ali umuntu sile uwakaele wino Yezebele wakomile. Wakomile antu aingi aatemilwe Yeova. Nupya wapepanga ivilubi nu kucita ivintu vyuze iviipe. Yeova waweni ivintu viipe vino Yezebele wacitanga. Uzye wali nu kumucita uli?

Lino Aabu wafwile, Yolamu umwana wakwe uwatandike ukuteeka. Yeova watumile umonsi uwi izina ilyakuti Yeu mukufulula Yezebele nu lupwa lwakwe.

Yeu wakwezile iceleta lyakwe nu kuya uku Yezileele, ukwikalanga Yezebele. Lino Yolamu wamuweni waile umu kumukomenkanya ni celeta lyakwe nupya wamuzizye ati: ‘Uzye pali mutende pakasi kitu? Yeu nawe wamwaswike ati: ‘Pangaya uli umutende, lino mayo wako Yezebele,  akacita iviipe?’ Yolamu wapindulwile iceleta lyakwe kuti autuke. Nomba Yeu wamulasile nu luceto afwa nu kufwa.

Lyene Yeu waile ukwi isano lyakwe Yezebele. Lino Yezebele uvwile ukuti akwiza, wapensile ivipa, asaakula inyele, aya nu mukumulolela pi windo lya pa ntunti. Lino Yeu wafisile, Yezebele wamulamwike cilumba cilumba. Yeu wapundiilile aomvi yakwe Yezebele aimi mupiipi nawe ati: ‘Musumbilini pansi!’ Yamunyemwile iyamusumbila api windo, apona pansi afwa nu kufwa.

Pa cisila cakwe vii, Yeu wakomile ana aonsi 70 yakwe Aabu nu kusangulula impanga umwali ya kapepa yakwe Baali. Uzye watulola ukuti Yeova akalola vyonsi, nupya akafulula yaakacita ya viipe pa nsita ilinge?