Jãn wũntõ in m̦weo im̦õn Kiiñ Ehab ilo Jezriel, ear maroñ reilo̦k im loe jikin kallib kũreep eo an juon em̦m̦aan etan Nebot. Ehab ear kõn̦aan bõke jikin kallib in bwe en an, im ear kajjioñ in wiaiki jãn Nebot. Ak Nebot ear m̦akoko in wiakake jikin kallib in an ñane. Etke? Kõnke ekkar ñan kien ko an Jeova, ear mo̦ an juon wiakake wãto ko ear jolõti. Ehab ear ke kautiej pepe in ejim̦we an Nebot? Ear jab. Ehab ear lukkuun illu. Joñan, ear pãd wõt ilowaan ruum̦ eo an im ear jab kõn̦aan m̦õñã ñan jidik.

Lerooj nana eo pãleen Ehab etan Jezebel, ear ba ñan l̦ein pãleen: ‘Kwe kiiñ eo an Israel. Ewõr am̦ maroñ ñan bõk jabdewõt men eo kokõn̦aan. Inaaj bõke jikin kallib en̦ bwe en am̦.’ Kõn men in, Jezebel ear jejel̦o̦k ñan rũtõl ro an jikin eo im ba ñan er bwe ren riab im ba Nebot ear kõnono n̦ae Anij im bwe ren kade ñan mej. Rũtõl rein rar kõm̦m̦ane men in Jezebel ear jiroñ er bwe ren kõm̦m̦ane. Innem Jezebel ear ba ñan Ehab: ‘Emej Nebot. Am̦ kiiõ jikin kallib en̦.’

Ak ejjab Nebot wõt Jezebel ear m̦ane. Ear bar m̦ane elõñ iaan armej ro rem̦m̦an me rar yokwe Jeova. Bareinwõt, lerooj in ear kabuñ ñan ekjab ko im kõm̦m̦ani men ko jet renana. Jeova ear loe aolep men kein renana Jezebel ear kõm̦m̦ani. Kõn men in, ta eo Jeova enaaj kõm̦m̦ane ñane?

Jet iiõ tokãlik jãn iien eo Ehab ear mej, l̦eo nejin etan Jehoram ear jino kiiñ. Jeova ear jilkinl̦o̦k juon em̦m̦aan etan Jihu bwe en kaje Jezebel im baam̦le eo an.

Jihu ear ettõr kõn jariot eo waan ñan Jezriel, jikin eo Jezebel ear jokwe ie. Jehoram ear bar ettõrl̦o̦k ñan ippãn Jihu kõn jariot eo waan. Ke Jehoram ear iioone Jihu, ear kajjitõk ippãn: ‘Kwõj itok ke ilo aenõm̦m̦an?’ Jihu ear uwaak im ba: ‘Eban wõr aenõm̦m̦an toon wõt an kõrã en̦ jinõm̦, Jezebel, kõm̦m̦ani  men kan̦ renana ej kõm̦m̦ani.’ Ke ej ba men in, Jehoram ear karo̦o̦le jariot eo waan im ko. Ak Jihu ear lippo̦n̦e Jehoram im emej.

Innem Jihu ear etal ñan m̦weo im̦õn kiiñ, ijo Jezebel ear pãd ie. Ke Jezebel ear roñ bwe Jihu ej etal, ear kakõm̦anm̦ane turin mejãn im bõran, im kõttar ilo wũntõ eo lõñ ilo m̦weo. Ke Jihu ear jãde, ear nana an Jezebel kõnnaanl̦o̦k ñane. Ak Jihu ear lam̦õj lõñl̦o̦k ñan rijerbal ro rej jutak iturin Jezebel im ba: ‘Kom̦win ko̦wõtlo̦ke lien̦e!’ Rijerbal rein rar iuuni im ko̦wõtlo̦ke Jezebel jãn wũntõ eo im emej.

Ãlikin an wal̦o̦k men in, Jihu ear bar m̦an l̦õm̦aro 70 nejin Ehab im jol̦o̦k ekjab ko an Beal jãn ãneo. Kwaar ke jel̦ã bwe Jeova ejel̦ã kõn aolep men ko rej wal̦o̦k, im ej kaje ro rej kõm̦m̦ani men ko renana ilo iien eo ejejjet?