Rĩm a Akaab sã n da be na-yirã Yizreyɛlle, n ges a fenetrẽ wã, a nee viyn pʋʋgo. Yaa rao a ye yʋʋr sẽn boond t’a Nabot n so. A Akaab ra rata pʋʋgã. A makame n na n da, la a Nabot zãgsame. Bala a Zeova yeelame tɩ ned pa segd n koos a rogem-pʋɩɩr ye. Rẽ yĩnga, a Akaab saka a Nabot sẽn yeelã bɩ? Ayo. A sũurã yikame hal t’a zãgs t’a kõn yi a roogẽ wã, la t’a kõn dɩ me ye.

A Akaab pag a Zezabɛll sẽn yaa nin-wẽngã yeel-a lame: ‘Foo la Israyɛll rĩma. Fo tõe n paama fo sẽn dat fãa. Mam na n deega pʋʋgã n kõ foo.’ Pagã gʋlsa lɛta n kõ tẽngã nin-kẽembã, n yeel-b tɩ b yag ziri n yeel t’a Nabot tʋʋsa Wẽnnaam, la b lob-a kug t’a ki. B sɩd maana wa a Zezabɛll sẽn yeelã. Rẽ poore, a Zezabɛll yeela a Akaab yaa: ‘A Nabot kiime. A pʋʋgã lebga foo n so.’

Pa a Nabot bal la a Zezabɛll kɩt tɩ b kʋ zaalem yĩng ye. A kʋʋ neb wʋsg sẽn da nong a Zeova. A Zezabɛll ra pʋʋsda bõn-naandse, la a maand bũmb a taab sẽn pa sõma. A Zeova ra nee bũmb nins fãa a sẽn maandã. A na n maana bõe?

A Akaab sẽn ki wã, a biig a Zoram n lebg rĩma. A Zeova tʋma rao a ye yʋʋr sẽn boond t’a Zehu, n yeel t’a tɩ kʋ a Zezabɛll ne a zakã rãmba.

A Zehu kẽe a saarã n na n kẽng a Zezabɛll nengẽ Yizreyɛlle. A Zoram me kẽe saare, n sɛg a Zehu n sok-a yaa: ‘Zehu, yaa noog tɩ f wat m nengẽ?’ T’a Zehu yeel-a yaa: ‘Pa noog ye. Bala f ma a Zezabɛll ket n maanda sẽn pa sõma.’ A Zoram wẽnemda a saarã n na n zoe, t’a Zehu tão-a ne tãp t’a ki.

 Rẽ poore, a Zehu kẽnga a Zezabɛll nengẽ. A Zezabɛll sẽn wʋm t’a Zehu watame wã, a yikame n maneg a zugã, n nag sõma, n tɩ yas roogã yĩngr fenetrẽ wã n gũudẽ. A Zehu sẽn ta, a Zezabɛll pʋʋs-a-la gãs-gãse. A Zehu kelmame n yeel a Zezabɛll tʋm-tʋmdbã yaa: ‘Tus-y-yã-a t’a tũ fenetrẽ wã n lʋɩ!’ B sɩd tus-a lame t’a yi yĩngrã n lʋɩ n ki.

Rẽ poore, a Zehu kʋʋ a Akaab kom-dibli 70, la a kʋ neb nins fãa sẽn da pʋʋsd a Baalã. Fo pa tagsd t’a Zeova nee bũmb fãa, la tɩ wakatã sã n ta, a na n sɩbga neb nins sẽn tʋmd tʋʋm-wẽnsã sɩda?