Ha njanena ya nganda yeni ya mu Yezelele, Muangana Ahave ua muene citungu ca viniu ca umo yala lizina lieni Navote. Ahave ua lemene citungu caco, kaha ua tondele Navote a mu landeseco! Vunoni Navote ua vianene ku mu landesaco, muomu ku landesa cihela ca vusuana ka ca litombuele na Lisiko lia Yehova. Vuno Ahave ua singimikile Navote omo lia ku linga via cili ni? Houe. Ahave ua vuile ku pihia. Ua nienguele cikuma, kaha ka tavele ku tunda mu hondo yeni na ku viana ku lia.

Mpuevo ua mupi ua Ahave, Lisano Yezevele, ua mu lekele ngueni: ‘Ove u muangana ua Isaleli. U hasa ku kala na viose vi u tonda. Nji ka ku tambuila cize citungu.’ Kaha ua sonekelele vakuluntu va mbonge mukanda, linga va vangeye Navote nguavo ua singile Njambi, kaha va na pandele ku mu tsiha na mavue. Vakuluntu va mbonge va lingile via tumine Yezevele, kaha mu nima yavio Yezevele ua lekele Ahave ngueni: ‘Navote na tsi! Citungu ceni ca viniu ci na pu honi cove.’

Navote kati ikeye lika ya tsihile Yezevele. Ua tsihile vantu vavengi va lemene Yehova. Ua kele na ku lemesa tumponia na ku linga viuma via vingi via vipi. Yehova ua muene viuma viose via vipi via lingile Yezevele. Kaha vati Yehova ua mu lingile?

Mu nima ya ku tsa ca Ahave, muaneni Yeholame ua puile muangana. Kaha Yehova ua tumine yala ua lizina Yehu ku hana kasitiku kuli Yezevele na vusoko vueni.

Yehu ua londele mu litemba lieni na ku ya ku Yezelele, ku mbonge ya kele Yezevele. Yeholame ua tuhukile na litemba lieni na ku liuana na Yehu, kaha ua mu hulile ngueni: ‘Ha kati ketu hali ciyulo ni?’ Kaha Yehu ngueni: ‘Ka tu kala mu ciyulo nga vanoko, Yezevele va tualelelaho ku linga vupi.’ Haze vene, Yeholame ua setekele ku tengulula  litemba lieni na ku tina. Vunoni Yehu ua mu asele mungamba, kaha ua tsile.

Kaha Yehu ua ile ku nganda ya Yezevele. Omo Yezevele ua vuile ngecize Yehu ali na ku iza, ua liviukisile ku meso na ku vuahesa vinkambu vieni, kaha ua mu tumamenene ku njanena ya kuilu. Omo Yehu ua hetele, ua mu menekele na vutenu. Kaha Yehu ua tambakanene vangamba va Yezevele va kele ku mukulo ueni, ngueni: “Mu mbilenu ha mavu!” Kaha va mu mbilile ha mavu, ngeci ua tsile.

Mu nima yaco, Yehu ua tsihile vana va Ahave va ku pua 70 na ku zimangana ku lemesa ca Mbale. Nga Yehova ua tantekeyele viose via solokele ku ntsimbu ize, na vuno vene, ue ku hana kasitiku kuli vaze ve ku linga viuma via vipi, ni vati?