Popepi nuuwa womukwaniilwa Ahab, muJesreel, opwa li oshitsambe shomiviinu shomulumentu Nabot. Uuna omukwaniilwa Ahab e li pekende lyuuwa we okwa li ha kala e shi wete. Ahab okwa li a hala oshitsambe shoka nokwa kambadhala e shi lande ko. Ihe Nabot okwa tindi oku shi landitha po, oshoka kasha li metsokumwe nOmpango yaJehova okulanditha po oshitsambe sha thigululwa. Mbela Ahab okwa li ngaa u uvitile Nabot ombili sho a tindi? Aawe. Ahab okwa li a thita po kondjahi. Okwa kala a lala mombete ye a geya nayi. Okwa li nokuli a tindi okulya.

Omukulukadhi gwaAhab, omukwaniilwakiintu Isebel, ngoka a li omukolokoshi okwe mu lombwele a ti: ‘Ngoye omukwaniilwa gwaIsraeli. Oto vulu okukala wu na kehe shimwe wa hala. Otandi ke ku pa oshitsambe shoka.’ Okwa nyolele aawiliki yoshilando, e te ya lombwele ya lundile Nabot kutya okwa tuka Kalunga, opo a dhipagwe nomamanya. Okuza mpono aawiliki oya ningi ngaashi Isebel e ya lombwele. Opo ihe Isebel okwa lombwele Ahab a ti: ‘Nabot okwa sa, inda wu ka kuthe po oshitsambe she.’

Shono hasho oshikando shotango Isebel ta dhipagitha omuntu kee na ondjo. Okwa dhipagitha aantu oyendji mboka ye hole Jehova. Isebel okwa li ha longele iikalunga nokwa longa iinima yilwe iiwinayi. Jehova okwa li e wete iinima ayihe iiwinayi mbyoka ta ningi. Mbela Jehova okwa li te ke mu ningila shike?

Konima sho omukwaniilwa Ahab a si, omwana Joram, okwa ningi omukwaniilwa. Jehova okwa tumu Jehu a ka dhipage Isebel mwa kwatelwa ezimo lye.

Jehu okwa londo etemba lye, e ta yi kuJesreel, hoka kwa li kwa kala Isebel. Omukwaniilwa Joram okwe ya netemba lye e mu tsakaneke, e te mu pula ta ti: ‘Opu na ngaa ombili pokati ketu?’ Jehu okwa yamukula a ti: ‘Kapu na mbili oshoka nyoko Isebel, ota longo uuwiinayi.’ Joram okwa tanawuna etemba lye a fadhuke po, ihe Jehu okwa kutha uutati we, e ta yaha Joram noshikuti e ta si.

 Opo ihe Jehu okwa yi kuuwa waIsebel. Sho Isebel u uvu kutya Jehu ote ya, okwi iyopaleke moshipala, e ta kamula omafufu ge. Okwa kala e mu tegelela pekende lyopombanda. Sho Jehu a thiki, Isebel okwe mu popitha nondhino. Jehu okwi igidha aapiya yaIsebel mboka ya li ya thikama popepi naye, a ti: “Undulileni Isebel pevi!” Oye mu undula okupitila mekende, e ta gwile pevi e ta si.

Konima yaashono, Jehu okwa dhipaga oyanamati yaAhab 70. Okwa kombo po ayehe mboka haya simaneke Baal moshilongo. Jehova oku wete kehe shimwe, ye oha geyele mboka haya ningi iinima iiwinayi, pethimbo lye lyo opala.