Go be go na le monna yo mongwe kua Jeseriele yo a bego a na le serapa sa diterebe kgauswi le ntlo ya Kgoši Ahaba. Leina la monna yoo e be e le Nabothe. Kgoši Ahaba o be a kgona go bona serapa seo ka lefasetere la ntlo ya gagwe. Ka ge a be a se nyaka, o ile a botša Nabothe gore a mo rekišetše sona. Nabothe o ile a gana, ka gobane Molao wa Jehofa o be o sa dumelele motho gore a rekiše tšhemo ya gabo. Na Ahaba o ile a thabišwa ke gore Nabothe o latela molao wa Modimo? Aowa. Ahaba o ile a galefa kudu. O ile a kwata kudu moo a ilego a gana go tsoga mpeteng le go ja.

Ke moka mosadi wa Ahaba e lego Mohumagadi Isebele, yoo a bego a na le pelo e mpe, a re go Ahaba: ‘O kgoši ya Isiraele. O ka ba le selo se sengwe le se sengwe seo o se nyakago. Nna ke tla dira gore serapa sela sa Nabothe e be sa gago.’ Ke moka Isebele a ngwalela bagolo ba motseng wa Jeseriele mangwalo, a ba botša gore ba bolele gore Nabothe o rogile Modimo gomme ba mmolaye ka maswika. Bagolo bao ba ile ba dira seo Isebele a ba boditšego sona, ke moka yena a tla go Ahaba a re: ‘Nabothe o hwile. O ka tšea serapa sela sa gagwe sa diterebe.’

Nabothe e be e se moloki a nnoši yo Isebele a mmolailego. Isebele o be a bolaile batho ba bantši bao ba bego ba rata Jehofa. O be a rapela medimo ya maaka gomme a dira le dilo tše dingwe tše mpe. Jehofa o be a bona dilo ka moka tše mpe tšeo Isebele a bego a di dira. Bjale o ile a dira eng ka yena?

Ka morago ga gore Ahaba a hwe, morwa wa gagwe e lego Jehorama o ile a ba kgoši. Jehofa o ile a roma monna yo a bitšwago Jehu gore a yo bolaya Isebele le lapa la gagwe.

Jehu o ile a namela koloi ya gagwe gomme a ya Jeseriele, moo Isebele a bego a dula gona. Jehorama o ile a tla ka koloi gomme a gahlanetša Jehu. Ke moka a mmotšiša a re: “Jehu, na go na le khutšo?” Jehu a re: ‘Go ka se be le khutšo ge feela Isebele mmago a sa dutše a dira dilo tše mpe.’ Gateetee Jehorama a retologa ka koloi ya gagwe gore a tšhabe, eupša Jehu a mo thunya ka mosebe gomme a mmolaya.

 Ke moka Jehu a ya ntlong ya Isebele ka mošate. Ge Isebele a ekwa gore Jehu o e tla, a itlotša ka ditlolo sefahlegong, a lokiša meriri ya gagwe gabotse gomme a lebelela fase ka lefasetere la phapoši ya ka godimo. Ge Jehu a fihla, Isebele o ile a mo dumediša gampe. Ke moka Jehu a goeletša bahlanka ba Isebele bao ba bego ba eme kgauswi le Isebele a re: ‘Mo lahleleng mo fase!’ Banna bao ba lahlela Isebele fase ka lefasetere, gomme a hwa.

Ka morago ga moo, Jehu o ile a bolaya barwa ba 70 ba Ahaba gomme a dira gore batho ba se sa rapela modimo wa Baali. Na o a bona gore Jehofa o bona dilo ka moka tšeo di diregago mo lefaseng, le gore o otla bao ba dirago dilo tše mpe?