Omugabe Ahabu akaba naabaasa kureeba omusiri gw’emizaabibu ogw’omushaija orikwetwa Nabosi ari aha dirisa y’ekikaari kye omuri Yezereeli. Ahabu akaba naayenda omusiri ogwo, kandi akateeraho kugugura ahari Nabosi. Kwonka Nabosi akanga kugumuguza ahakuba kikaba nikihenda ekiragiro kya Yehova eky’okutaguza obuhunguzi bw’eitaka. Mbwenu shi Ahabu akasiima Nabosi ahabw’okukora ekihikire? Ngaaha. Ahabu akagira ekiniga kingi. Akaguubwa kubi munonga akaba atarikubaasa kuruga omu kitanda kye, kandi akanga kurya.

Muka Ahabu, Yezebeeli Omugabekazi mubi, akamugira ati: ‘Niiwe orikutegyeka Israeli. Noobaasa kutunga kyona eki orikwenda. Nyowe niinyija kukuha ogwo musiri.’ Akahandiika ebaruha, yaazitwekyera abakuru b’orurembo, yaabagira ngu babeiherere Nabosi ngu akyeenire Ruhanga kandi bamuteere amabaare. Abakuru b’orurembo bakakora nk’oku Yezebeeli yaabagambiire, bwanyima Yezebeeli akagira Ahabu ati: ‘Nabosi afiire. Omusiri gw’emizaabibu n’ogwawe.’

Nabosi tiwe wenka ou Yezebeeli yaitsire ataine rubanja. Akaita abantu baingi abaabaire nibakunda Yehova. Akaba naaramya ebishushani kandi akakora n’ebindi bibi bingi. Yehova akareeba ebintu bibi byona ebi Yezebeeli yaakozire. Akaba naija kumukorera ki?

Ahabu ku yaafiire, omutabani Yehoraamu akaba omugabe. Yehova akoohereza omushaija orikwetwa Yehu kufubira Yezebeeli n’eka ye.

Yehu akavuga ekigaari kye yaaza Yezereeli, ahu Yezebeeli yaabaire naatuura. Yehoraamu akaija aha kigaari kubugana Yehu kandi akamubuuza ati: ‘Hariho obusingye?’ Yehu akamugarukamu ati: ‘Tiharikwija kubaho obusingye nyoko, Yezebeeli, yaaba naakikora ebintu bibi.’ Yehoraamu akateeraho kuhindura ekigaari kye  kugyenda. Kwonka Yehu akananuura obuta yaamuteera omwambi yaamwita.

Bwanyima Yehu akaza omu kikaari kya Yezebeeli. Ku yaamanyire ngu ariyo naija, akaboneza amaisho ge, yaaboneza eishokye rye, yaaringuririza omu dirisa. Yehu ku yaahikireyo, Yezebeeli akamuramutsya n’ekiniga. Yehu akagambira abaheereza be ati: “Mu munagye ahansi.” Bakarabya Yezebeeli omu dirisa, yaagwa ahansi yaafa.

Bwanyima y’ekyo, Yehu akaita batabani ba Ahabu 70 kandi yaashemeza omwanya yaihamu okuramya Baali. Waareeba oku Yehova arikumanya buri kimwe kandi omu bwire obuhikire, akafubira abarikukora ebintu bibi?