Saa Belemgbunli Ehabe gyi ye sua ne nvɛnzɛlɛ ne anu a, ɔnwu nrenyia bie mɔɔ bɛfɛlɛ ye Neebɔto la vanye ɛya ne. Ehabe anye bolole ɛya ne yemɔti ɔhanle kɛ ɔtɔ yeavi Neebɔto ɛkɛ. Noko Neebɔto anyɛ ɔluakɛ ɛnee ɔtia Gyihova Mɛla kɛ awie badɔne ye abusua azɛlɛ. Asoo Ehabe anye liele kɛ Neebɔto yɛle mɔɔ le kpalɛ la ɔ? Kyɛkyɛ. Ehabe vale ɛya. Ɔvale ɛya dedee mɔɔ ɛnee ɔngulo kɛ ɔfi ye suakunlu ɛkɛ ne ɔfinde a, yɛɛ aleɛ bɔbɔ yeanli bie.

Ehabe aye Belemgbunli Raalɛ Gyɛzɛbɛle atisesebɛ ne hanle kɛ: ‘Ɛdawɔ a ɛle Yizilayɛ belemgbunli a. Ɛkola ɛnyia debie biala mɔɔ ɛkpondɛ la. Mebalie azɛlɛ ne meamaa wɔ.’ Ɔhɛlɛle ngɛlata ɔhɔmaanle sua ne azo mgbanyima kɛ bɛbɔ Neebɔto somolɛ kɛ yeha munzule yetia Nyamenle na bɛzi ye awolɛ bɛhu ye. Mgbanyima ne mɔ yɛle mɔɔ Gyɛzɛbɛle hanle la, akee ɔzele Ehabe kɛ: ‘Neebɔto ɛwu! Kɔva ye ɛya ne.’

Tɛ Neebɔto ala a le sonlakpalɛ mɔɔ Gyɛzɛbɛle hunle ye a. Ɔhunle Gyihova azonvolɛ dɔɔnwo. Ɔzonlenle awozonle yɛɛ ɔyɛle ɛtane dɔɔnwo. Gyihova nwunle ɛtane mɔɔ Gyɛzɛbɛle yɛle la amuala. Duzu a Gyihova bava ayɛ ye a?

Mɔɔ Ehabe wule la, bɛvale ɔ ra Gyɛhɔlam bɛziele belemgbunli. Gyihova zoanle nrenyia bie mɔɔ bɛfɛlɛ ye Gyihu la ɔmaanle ɔhwenle Gyɛzɛbɛle nee ye abusua ne amuala anzo.

Gyihu hanle ye ehwili ne hɔle Gyɛzɛlii, ɛleka mɔɔ Gyɛzɛbɛle de la. Gyɛhɔlam vole ye ehwili ɛdeɛ hɔyiale Gyihu na ɔbizale ye kɛ: ‘Ɛlɛba me nwo ɛke anzodwolɛ nu ɔ?’ Gyihu hanle kɛ: ‘Anzodwolɛ ɛnrɛra wɔ mekɛ mɔɔ wɔ mame Gyɛzɛbɛle ɛlɛyɛ  ninyɛndane la.’ Gyɛhɔlam bɔle mɔdenle kɛ ɔkakyi ɔ nwo yeanriandi yeahɔ. Noko Gyihu dole atwɛ wɔle ye maanle ɔwule.

Akee Gyihu hɔle Gyɛzɛbɛle sua nu ɛkɛ. Mɔɔ ɔdele kɛ ɔlɛba la, ɔzieziele ɔ nwo hyeleenyi na ɔhɔgyinlanle ye sua ne azo anwuma nvɛnzɛlɛ ne anu kɛ ɔkendɛ ye. Mɔɔ Gyihu dwule ɛkɛ ne la, Gyɛzɛbɛle bizale ye ahye kputilii. Gyihu deanle nu hilele ye azonvolɛ ne mɔ mɔɔ gyigyi ɔ nwo ɛkɛ ne la kɛ: ‘Bɛvuandi ye bɛde aze!’ Yemɔti bɛzuhunle ye bɛvile ye nvɛnzɛlɛ ne anu bɛdele ye aze na ɔwule.

Akee Gyihu hunle Ehabe amra mrenyia 70 ne na ɔyele Beeyale ɛzonlenlɛ ɔvile azɛlɛ ne azo. Wɔyɛ ye nzonlɛ kɛ Gyihova nwu debie biala na ɔtwe menli mɔɔ yɛ ɛtane la anzo wɔ mekɛ kpalɛ nu ɔ?