Diad bintana na palasyo ed Jezreel, sankanengneng nen Arin Ahab so dalin nen Nabot ya pantataneman na ubas. Labay ya naala nen Ahab iyan dalin, kanian sasaliwen tod si Nabot. Balet aglabay ya ilako nen Nabot ta diad Ganggan nen Jehova et agnayarin ilako so tawir ya dalin. Kasin nirespeto nen Ahab so dugan desisyon nen Nabot? Andi. Nampasnok ya maong si Ahab. Diad pansyodot to, nankulong ed kuarto to tan agto labay so mangan.

Imbaga nen Reyna Jezebel, say mauges ya asawa nen Ahab: ‘Sika so ari na Israel. Kanian sarag mon alaen so amin ya labay mo. Pulyan mo, akauley ak lan mangalad dalin to.’ Sinulatan nen Jezebel iray mamatatken ed syudad na Jezreel. Imbaga tod sikara ya palsaan day Nabot ya agto igagalang so Dios insan da tupaken na bato anggad ompatey. Inunor na saray mamatatken so ingganggan nen Jezebel. Kayari to ’tan, imbaga nen Jezebel ed si Ahab: ‘Inatey lay Nabot. Gawam la may dalin to.’

Aliwan si Nabot labat so toon anggapoy kasalanan ya pinatey nen Jezebel. Impapatey to so amayamay ya totoon inaro day Jehova. Nandayew si Jezebel ed saray idolo tan dakdakel ni ray ginawa ton mauges. Anengneng nen Jehova iratan ya amin. Anto kasi gawaen tod si Jezebel?

Nen inatey lay Ahab, say anak ton si Jehoram so sinmalat ya ari. Angibaki si Jehova na laki ya say ngaran to et Jehu pian dusaen si Jezebel tan say pamilya to.

Linmugan si Jehu ed karwahe to paonlad Jezreel, diad panaayaman nen Jezebel. Inmabet si Jehoram ya akakarwahe met tan tinepetan toy Jehu: ‘Linma ka dia parad kareenan?’ Imbaga nen Jehu: ‘Anggapoy kareenan no ag-ontundan manggaway  mauges si inam ya Jezebel!’ Imbaliwas a tampol nen Jehoram so karwahe to pian ontakas. Balet pinana nen Jehu si Jehoram, kanian inatey.

Insan linmay Jehu ed palasyo nen Jezebel. Nen naamtaan nen Jezebel ya nitan lay Jehu, nan-make up, inayos toy buek to, tan nantalaran diad bintana ed tagey na palasyo. Kasabi nen Jehu, imbano nen Jezebel pero aliwan marespeto. Inmeyag si Jehu ed saray lingkor nen Jezebel ya walad abay to, ya imbaga tod sikara: “Ipelag yo!” Impelag dad bintana si Jezebel, kanian inatey.

Kayari to, pinatey nen Jehu so 70 ya ananak nen Ahab tan dinederal to ray altar nen Baal. Talagan amta nen Jehova so amin ya nagagawa, tan dudusaen to iray manggagaway mauges, awa?