Rey Achabqa Jezreelpi kamachina wasi ventananmanta Nabotpa uvas huertanta rantikapuyta munaspa qhawaj. Nabottajrí mana vendepuyta munarqachu. Imajtinchus Diospa Leynin nerqa: “Jallpʼata herenciata japʼispaqa, ama vendenkichejchu”, nispa. Nabotqa Diosta kasukusharqa. Achabtajrí chayta jatunpaj qhawananmantaqa, manchayta phiñakorqa. Chayraykutaj wasinpi wisqʼaykukuspa ni mikhojllapis llojsimuyta munarqachu.

Sajra warmin Jezabeltaj nerqa: “Reyqa munasqanta ruwayta atinki. Chay jallpʼata conseguichisqayki”, nispa. Chantá Jezabelqa llajtamanta kurajkunaman qhelqarqa: “Nabotta ‘Diospa contranpi parlan’ nispa tumpaychej, rumiwan chʼanqaspataj wañuchiychej”, nispa. Kurajkunataj chayta ruwarqanku. Chantá Jezabel qosanta nerqa: “Nabot wañunña, huertanta japʼikanpuy”, nispa.

Jezabelqa mana Nabotllatachu qhasimanta wañucherqa, manachayqa Jehová Diospa ashkha kamachisnintapis. Chantapis chay warmeqa santosta yupaychaj, millay imastawantaj ruwaj. Jehová Diostajrí chayta qhawamusharqa. ¿Imatá pay ruwarqa?

Jehová Diosqa Jehuta churarqa, Jezabelta familiantawan chinkachinanpaj. Chaytaj karqa Achab wañupusqantawan, wawan Joram gobernashajtin.

Jehuqa carretanman wichariytawan, Jezreelman rerqa. Chaypitaj Jezabel tiyakorqa. Jorampis carretanman wichariykuspa Jehuwan tinkoj rerqa. Jehutataj taporqa: “¿Tukuy ima allillanchu?”, nispa. Jehutaj nerqa: “Ni imapis allin kanmanchu, mamayki Jezabel sajra imasta ruwajtenqa”, nispa. Chantá Joramqa carretanta muyurichiytawan, ayqekuyta munarqa. Jehutaj flechawan Joramta wañurpacherqa.

 Chantá Jehuqa Jezabelpa kamachina wasinman rerqa. Jezabeltaj pay rishasqanta yachaspa, ñawisninta pintakorqa, sumajtataj peinakorqa. Altos pata ventanamanta qhawaspataj suyarqa. Jehú yaykojtintaj Jezabelqa payta qhapariykorqa. Jehutaj ventanapi kasharqanku chay kamachista qhaparerqa: “Uraman chay warmita wijchʼuykamuychej”, nispa. Paykunataj Jezabelta wijchʼuykamorqanku. Ajinamanta chay warmeqa wañorqa.

Chantá Jehuqa Achabpa 70 wawasninta wañuracherqa. Chantapis Baalta yupaychayta chinkacherqa. Yachakunchej jina, Diosqa tukuy imata qhawamushan, mana allinta ruwajkunatataj tiemponpi castigan.