Pa ri uventana ri upalacio pa Jezreel, ri ajawinel Acab kril apan ri rulew jun achi ubʼiʼ Nabot. Acab kraj wajun ulew riʼ xuqujeʼ xraj xuloqʼ che Nabot. Are kʼu Nabot kraj ta kukʼayij rumal che ri uTaqanik ri Jehová kubʼij che kuya taj kkʼayix ri ulew che kiyaʼom kan ri e nan tat che echabʼal. Nabot xubʼan ri qas utz. ¿La kachomaj che Acab xunimaj ri xuchaʼ ubʼanik ri Nabot? Xunimaj taj. Acab sibʼalaj xpe royowal. Sibʼalaj royowal che kraj taj kel lo pa ri uwarabʼal xuqujeʼ kʼo ta kraj kutijo.

Ri rixoqil ri Acab are ri itzelalaj ajawinel ixoq ubʼiʼ Jezabel. Areʼ xubʼij che: «At are ri ajawinel re Israel, rumal laʼ kuya kkʼojiʼ awukʼ ronojel ri kawaj. In kinriq na ri ulew tekʼuriʼ kinya chawe». Xutzʼibʼaj jujun wuj chke ri ajkʼamal bʼe re ri tinamit. Pa ri e wuj riʼ xubʼij che Nabot xchʼaw rukʼ itzel taq tzij chrij ri Dios xuqujeʼ che kkikamisaj rukʼ abʼaj. Ri e ajkʼamal bʼe xkibʼan ronojel ri xetaq che ubʼanik rumal ri Jezabel. Tekʼuriʼ, areʼ xubʼij che Acab: «Kimik ri Nabot kaminaq chik. Kuya katkanaj kan rukʼ ri rulew».

Xaq xiw ta ri Nabot che kʼo ta umak xkamisax rumal ri Jezabel. Areʼ xukamisaj e kʼi nikʼaj chik winaq che kkiloqʼoqʼej ri Jehová. Xuqujeʼ kuqʼijilaj e tyox che e qastzij taj dioses xuqujeʼ kubʼan nikʼaj chik jastaq che utz taj. Are kʼu ri Jehová xril ronojel ri itzelal riʼ. ¿Jas kubʼan ri Jehová rukʼ Jezabel?

Are chi kaminaq chi Acab, xqʼax jun tiempo, ri ukʼojol ubʼiʼ Jehoram xumaj ajawinik. Jehová xutaq bʼi jun achi ubʼiʼ Jehú rech kukʼajisaj uwach ri Jezabel xuqujeʼ ri ufamilia.

Jehú xpaqiʼ bʼi pa ri uchʼichʼ tekʼuriʼ xbʼe pa Jezreel, ri lugar che kʼo wi Jezabel. Jehoram xuqujeʼ xbʼe pa ri uchʼichʼ rech kuriqaʼ ri Jehú. Are chiʼ xrilo, Jehoram xutaʼ che: «¿La kʼo jororibʼal chqaxoʼl?». Jehú xubʼij che: «Kʼo ta jororibʼal are chiʼ ri anan, Jezabel, kuya ta kan ubʼanik jastaq che  utz taj». Jehoram xraj xtzalij chrij rech kbʼek, are kʼu riʼ Jehú xukʼaq jun flecha che xukamisaj.

Tekʼuriʼ Jehú xbʼe pa ri palacio che kʼo wi Jezabel. Areʼ xretaʼmaj che petinaq, xusukʼumaj ribʼ, xupachʼuj ri uwiʼ tekʼuriʼ xreyej chuchiʼ ri ventana re ri ja che kʼo pa uwiʼ ri ja. Are chiʼ xopan ri Jehú, Jezabel xuchʼabʼej rukʼ itzel taq tzij. Jehú xuraq uchiʼ chke ri ajchakibʼ che e kʼo naqaj che ri ixoq: «¡Chikʼaqaloq!». Ri e areʼ xkikʼaq lo pa ri ventana, areʼ xtzaq lo pa ri ulew xuqujeʼ xkamik.

Are chiʼ bʼanom chi wariʼ, Jehú xukamisaj ri e 70 ralkʼwal ri Acab xuqujeʼ xresaj pa ri tinamit ri qʼijilanik che Baal. ¿La kawilo? Jehová retaʼm ronojel xuqujeʼ kukʼajisaj kiwach ri kkibʼan jastaq che utz taj qas pa ri qʼij che rajawaxik chke.