Acabca Jezreel llajtapimi causarca. Paica paipaj mandana huasi ventanamantami Nabot runapaj uva chagrata ricuj carca. Chaimantami Acabca chai allpata charisha nishpa randinata munarca. Pero Nabotca mana cꞌatusha nircachu. Paica Diospaj leypica yaya cushca herencia allpataca mana cꞌatuna cashcatami yacharca. Nabotca allitami rurarca. ¿Nabot nishcata Acabca respetashcachu canga? Mana. Ashtahuanpish achcata pꞌiñarishpami paipaj cuartomanta mana llujshisha nirca, mana micusha nirca.

Acabpaj huarmi Jezabelca millaimi carca. Paimi cusataca, ‘canca Israelta mandajmi cangui. Can munashcatami chari tucungui. Chai allpataca ñucami canman cusha’ nirca. Chaimantami cartacunata quillcashpa cunaj yayacunaman cuchun cacharca. Chai cartacunapica Jezabelca, ‘Nabotca Diostami cꞌamirca. Chaimantami paitaca juchachishpa rumicunahuan shitashpa huañuchina canguichij’ nishpa mandarca. Chai cunaj yayacunaca Jezabel nishca shinami rurarcacuna. Chaipimi Jezabelca Acabtaca, ‘Nabotca huañushcami. Cunanca allpata japigrilla’ nirca.

Nabot runa mana culpata charijpipish Jezabelca huañuchircami. Pero, mana paillatachu huañuchirca. Diosta sirvijcunataca achcacunatami huañuchirca. Chashnallataj paica yanga dioscunatami adoraj carca. Achca mana allicunatami rurarca. Jehová Diosca tucuitami ricucurca. Chaimanta, ¿imatashi rurashca canga?

Acab huañushca qꞌuipaca paipaj churi Jorammi (Jehoram) mandai callarirca. Chaipimi Diosca Jehú shuti runata Jezabeltapish paipaj familiatapish castigachun cacharca.

Jehuca paipaj carropimi Jezabel causacuj Jezreel llajtaman rirca. Jorampishmi paipaj carropi Jehuhuan parlanacungapaj rirca. Ñanpi tupanacushpaca Joramca, ‘¿Jehú alli causai tiyachunchu shamungui?’ nircami. Jehuca, ‘cambaj mama Jezabel millaita ruracujpica ima alli causaitaj  tiyangari’ nircami. Chaipimi Joramca paipaj carrota muyuchishcahuan risha nirca. Pero Jehuca flechahuan shitashpami huañuchirca.

Qꞌuipaca Jehuca Jezabelpaj mandana huasimanmi rirca. Jezabelca Jehú shamucujta yachashpami ñahuita pintarishpa, umata sumajta allichirishpa jahua huasi ventanaman llujshishpa shuyarca. Jehú chayajpica pꞌiñarishpami saludarca. Jehuca Jezabelpaj ladopi caj sirvijcunataca, ‘¡chai huarmita pambaman shitaichij!’ nircami. Sirvijcuna ventanamanta tꞌangashpa shitajpimi paica huañurca.

Chai qꞌuipaca Jehuca Acabpaj 70 churicunatami huañuchirca. Baalta, paita adorajcunatapishmi tucuchirca. ¿Ricushcanguichu? Jehová Diosca tucuitami ricucun. Chaimanta, millaita rurajcunata ima horas castiganataca paimi yachan.