Kamachiq Acabmi Nabot sutiyuq runapa uvas huertanta munaruspan rantiyta munarqa. Jehova Diosmi ichaqa Israel runakunata kamachirqa taytankumanta chaskisqanku herencia chakrata mana rantikunankupaq. Chaymi Nabotqa kasukuq kasqanrayku rantikuyta mana munarqachu. Acabñataqmi mana kasuspan llumpayta Nabotpaq piñakururqa, hinaspam mikuytapas mana munaspan puñunanmanta lluqsiqchu.

Acabpa warmin Jezabelqa mana allin warmim karqa. Paymi nirqa: “Qamqa kamachiq kasqaykiraykum munasqaykita ruwanayki. Ñuqam chay uvas huertanta qichuspay qusqayki”, nispa. Hinaspam autoridadkunaman cartata apachirqa, chaypim kamachirqa Diosta ñakasqanmanta tumpaspanku rumiwan chuqapaspa Nabotta wañuchinankupaq. Nabotta autoridadkuna wañurachiptinkum Jezabelqa Acabta nirqa: “Nabotqa wañurunñam. Qampañam uvas huertanqa”, nispa.

Jezabelqa yanqamantam Jehova Diosman sunqu achka runakunata wañurachirqa, manam Nabotllatachu. Hinaspapas mana allinkunata ruwaspanmi taytacha-mamachakunata yupaycharqa. Ichaqa Jehova Diosmi rikurqa mana allin ruwasqankunata.

Acab wañuruptinmi churin Joramña kamachiyta qallaykurqa. Hinaptinmi Jezabelta aylluntinta castigananpaq Jehova Diosqa Jehu sutiyuq runata kamachirqa.

Chaynapim Jehuqa carretanman qispiruspa Jezabelman rirqa. Jezabelpa wawan Jorampas Jehuwan tupaqmi richkarqa, chaymi iskayninku ñanpi tuparurqaku. Joranmi Jehuta tapurqa: “¿Hawkallachu kachkanki?”, nispa. Jehuñataqmi nirqa: “Mamayki Jezabel mana allinkunata hinalla ruwaptinqa, manam hawkayayqa kanqachu”, nispa. Chaymi Joramta Jehu flecharuspa wañurachirqa carretanwan kutinanpaqña kachkaptin.

 Chaymantam Jehuqa Jezabelman rirqa. Jezabelñataqmi hamusqanta yacharuspan ñawinkunata pintapakururqa, chukchantapas simpakuruspanmi ventananpi suyarqa. Jehu chayaruptinmi Jezabelqa kamiyta qallaykurqa. Jehuñataqmi qaparispan Jezabelpa sirvientenkunata nirqa: “¡Ventananta wischuykamuychik!”, nispa. Chaynapim Jezabelqa wañururqa.

Chaymantapas Jehuqa Acabpa 70 churinkunatam wañurachirqa, hinaspam Baal taytachatapas chinkarachirqa. Chaynaqa, tukuy imatam Jehova Diosqa yachan hinaspapas kikinmi tantean mana allin ruwaqkunata haykapi castigananpaq.