Rey Ajabmi palacionpa ventananmanta rikuran Nabotpa chajranta. Jinan chay chajrata rantiyta munaran. Nabotmi ichaqa Diosta kasukuspa mana vendeyta munaranchu. ¿Imarayku? Jehová Diosmi kamachiran: “Tayta-mamaykimanta chaskisqayki herenciataqa ama vendenkichu”, nispa. ¿Respetaranchu Ajab Nabotpa decidisqanta? Manan, aswanmi sinchita phiñakuspa cuartonpi wisq’arukuspa mana mijuytapas munaranchu.

Jinan Ajabpa esposan Jezabelqa niran: “Qanmi Israelpi rey kanki, chhaynaqa ima munasqaykitan jap’ikuwaq. Noqan chay allpata qosayki”, nispa. Chaymi llaqtapi umallikunaman cartata apachiran. Chaypin niran: “Runakuna tumpachunku: ‘Nabotqa Diostan ñakan’, nispa. Chhaynapi rumiwan ch’aqespa wañuchinankupaq”, nispa. Jinan umallikunaqa chayta ruwaranku. Chay qhepamantaq Jezabelqa Ajabta niran: “Nabotqa wañusqan kashan. Kunanqa chajranta jap’ikapuy”, nispa.

Jezabelqa manan Nabotllatachu wañuchiran, aswanpas Jehová Diosta munakuq askha runakunatawanmi. Jinaspapas payqa idolokunatan adoraran. Jehová Diosmi ichaqa Jezabelpa ruwasqanta rikumusharan. Chhaynaqa, ¿imatan ruwaran?

Ajabpa wañupusqan qhepamanmi wawan Jehoram (Joram) rey karan. Jinan Jehová Diosqa Jehuta kacharan Jezabelta familiantawan castigananpaq.

Jehuqa carretanpin Jezabelpa tiyasqan Jezreel llaqtaman riran. Jehoramtaq carretanpi aypamuran Jehuwan parlananpaq. Tupaqtinkun Jehoramqa tapuran: “¿Sumaqpichu jamushanki?”, nispa. Jehutaq niran: “¿Imaynan sumaqpi jamushayman  mamayki Jezabel millaykunata ruwashaqtin?”, nispa. Jinan Jehoramqa kutirimuran ayqekunanpaq, Jehutaq flechaspa wañurachiran.

Chaymantan Jezabelpa palacionman riran. Jamunanta yacharuspan Jezabelqa uyanta pintakuran, chujchantapas ñaqch’akuran, altos ventanamanta qhawamuspataq suyaran. Jehú chayamuqtintaq Jezabelqa millayta k’amiran, Jehutaq Jezabelwan kaq runakunata kamachiran: “¡Wijch’uykamuychis!”, nispa. Jinan ventananmanta tanqaymuqtinku pampaman urmayamuspa wañuran.

Chaymantan Jehuqa Ajabpa 70 wawankunata wañuchiran Baal adoraytapas chinkachiranmi. Diosqa tukuy ruwasqanchistan rikumushan, tiempollanpitaqmi millay ruwaqkunata castiganqa.