Acab runaca Jezreel llactapi paipa mandana huasimandami, Nabot shuti runapa uvas tarpushca alpata ricushpa shayajurca. Acab runaca, Nabotpa alpatami randingapaj munajurca. Shinapash Jehová Dios cushca leypica taitacunapa herencia alpacunataca na jatunachu nishpami mandashca carca. Chaimandami Nabot runaguca na jaturca. Shinapash Nabot nishcataca Acab runaca ¿respetarcacha? Na respetashpami ninanda culirarca. Chaimi ni maiman na llujshishpa, micuitapash na micujurca.

Acab runapa huarmica millai, nali reina Jezabelmi carca. Chai huarmica cashnami nirca: ‘Canga Israel llactata jatun mandajmi cangui’. Can tucui munashcatami chari ushangui. ‘Nabot runapa uvas tarpushca alpataca, ñucami canman cusha’ nishpa. Chaimi cartacunata escribishpa llactata mandaj rucucunaman cacharca. Chai cartapica yangata juchachishpami cashna nirca, Nabotca Diostami nalicachishpa rimashca, chaimandami paitaca rumihuan pigashpa huañuchina canguichi nishpa. Chaimi jatun mandajcunaca Jezabel huarmi mandashcashnallata rurarca. Chai jipaca Jezabel huarmica Acabmanga nircami: ‘Nabot runapa uvas tarpushca alpataca japigrilla. Nabotca ñami huañushca’ nishpa.

Jezabel huarmica Nabot runagutallaca na huañuchishca carcachu. Jehová Diosta sirvij ashtaca gentecunatapashmi yangata juchachishpa huañuchirca. Shinallata Jezabelca yanga rurashca dioscunata adorashpa, shuj nali cosascunatapashmi rurashpa causan carca. Jezabel huarmipa tucui nali ruraicunata ricushpaca ¿imatata Jehová Diosca ruragrijurca?

Acab runa huañushca jipaca paipa churi Jehoram runami mandai callarirca. Chai punllacunapimi Jehová Diosca Jezabelta, paipa familiatapash llaquichichun Jehú runaguta cacharca.

Jehú runaguca paipa carretapimi Jezabel causaj Jezreel llactaman rirca. Jehoram runapashmi paipa carretapi Jehú runaguhuan parlangapaj rirca. Ñanbi tuparishpaca Jehoram runaguca cashnami tapurca: “¿Casilla ali causai tianllu?” nishpa. Chaimi Jehú runaguca nirca: Canba mama Jezabel nalicunatalla rurajujpica maitashi casilla ali causaica  tiangayari nishpa. Shina nijpimi Jehoram runaca paipa carretata tigrachishpa calpagrijurca. Chaimi Jehuca shuj flechahuan Jehoram runata huañuchirca.

Jipaca Jezabel huarmipa huasimanmi Jehuca rirca. Chaita yachashpami, Jezabel huarmica paipa ñavita, umatapash aliguta alichirishpa ventanamanda chapajurca. Jehú chayajpica Jezabel huarmica nalimanmi saludarca. Jezabelta ricushpaca chai huarmipa sirvijcunataca Jehuca cashnami caparirca: “Chai huarmita ucu alpaman shitamuichi” nishpa. Shinami ventanamanda tangashpa shitajpi chai huarmica huañurca.

Chai jipaca Jehú runaguca Acab runapa 70 churicunatami huañuchirca. Shinallata chai llactapi Baal diosta adorachunbash ñana saquircachu. Chaicunata ricushpaca ¿imatata yuyangui? Jehová Diosca tucuitami yachan. Shinallata Jehová Diosca nalita rurajcunata ima hora cashtiganataca alimi yachan.