О царё Ахаво жувэлас андо форо Изреель. Анда фэлястра, сави сас андэ лэско баро цэр, во додиқля о виноӷраднико, саво сас лэ Навуфеёско. Лэ царёсти чалеля кадэва виноӷраднико и во закамля лэс тэ тинэн. Но о Навуфеё отԥэндяпэ лэс тэ битинэн, важ кода кай андэ лэ Иеговаско законо ԥэнэнаспэ, кай нащи тэ битинэс кода, со пэрэжыля лэ папонэндар. Чалеля лэ Ахавости кода, кай о Навуфеё ритярэлас лэ Иеговаско законо? Най. О Ахаво фартэ пэр лэстэ холяйля. Во заԥандаделяпэ андэ пэстири комната, и отԥэнделяпэ тэ хал.

Кай о царё Ахаво сас хулаи, ла ақарэнас Иезавель. Вой сас фартэ найлащи. Вой ԥэндя пэстирэ хуласти: «Ту царё андо Израилё, и сар ту камэс кадя и трэбуй тэ авэл. Мэ стерава, кай кадэя ԥув авэла тири». И царица Иезавель пистросардя письморя лэ старейшинонэнди андо форо. Вой приԥэндя лэнди, кай вонэ тэ хохавэн по Навуфеё, кабута во дя амрая лэ Дэвлэс. Инке вой приԥэндя тэ помарэн лэ Навуфеёс лэ барэнца, кай во тэ мэрэл. И старейшиноря кадя и стердэ. После када, и Иезавель ԥэндя лэ Ахавости: «О Навуфеё муля. Залэ лэско виноӷраднико».

О Навуфеё сас най пэрво, кас умардя и Иезавель. Кадэя найлащи царица умардя бутэ лашэ манушэн, савэ любинас лэ Иеговас. Вой тэлёлас хохавнэ дэвлэнди и терэлас бут найлашэ дилы. О Иегова вся када диқэлас, и закамля тэ умарэл ла.

После кода, сар муля о Ахаво, царёса ашэля лэско шаво о Иорамо. О Иегова ԥэндя лэ муршэсти, савэс ақарэнас Ииуй тэ умарэл ла Иезавеля и латирэ ерес.

О Ииуй ладэлас по вурдон андо Изреелё. Котэ жувэлас Иезавель. О Иорамо вилагля каринг о Ииуё и пушля лэстар: «Лашимаса ту каринг амэндэ ладэс?» О Ииуё ԥэндя:  «Савэ лашимаса, кала тири дэй Иезавель терэл бут найлашэ дилы?» О Иорамо йто розбандярдя о вурдон и закамля тэ уладэл. Но о Ииуё мэкля андэр лэстэ и стрела анда луко и о Иорамо муля.

Тоди о Ииуё лагля каринг ла Иезавеляко баро цэр. Кала и Иезавель када ашундя, вой мақля и яқа, лашардя и бал, и ля тэ аштярэл лэс паша фэлястра упрэ по этажо. Кала о Ииуё авеля, вой асамаса ԥэндя лэсти доров. О Ииуё цыписайля лэ слуӷонэнди, савэ сас паша латэ «Сшон ла котар!» Вонэ сшутэ ла тэлэ и вой муля.

После када, о Ииуё умардя 70 лэ Ахавостирэ шавэн. Инке во стердя кадя, кай и мануша андо Израилё парашэлэ тэ тэлён хохавнэ дэвлэсти лэ Ваалости. Патян, кай о Иегова вся диқэл и авэла время, кала во на ашавэла кадя кодэлэнди, ко терэл найлашимос.