Te Kownu Akab ben de na ini en kownu-oso na Yisreyel èn a ben luku go na dorosei, a ben kan si a droifidyari fu wan man di nen Nabot. Fu di Akab ben wani a droifidyari, meki a ben wani bai en fu Nabot. Ma Nabot no ben wani seri en fu di a Wet fu Yehovah ben taki dati wan sma no mag seri a gron fu en famiri. Yu denki taki Akab ben e lespeki Nabot fu di a ben wani du san bun? Nôno. Akab ati ben bron srefisrefi. En ati ben e bron so te taki a no ben wani komoto na ini en kamra èn a no ben wani nyan.

Kownu-uma Iseibel, na ogri frow fu Akab, taigi en: ’Yu na a kownu fu Israel. Yu kan abi iniwan sani di yu wani. Mi o sorgu taki yu kisi a gron.’ A seni brifi gi den owru man fu a foto taki den musu lei gi Nabot taki a fluku Gado. Dan den musu meki sma ston en kiri. Den owru man du san Iseibel taigi den. Baka dati Iseibel taigi Akab: ’Nabot dede. A droifidyari na fu yu now.’

Nabot no ben de a wan-enkri bun sma di Iseibel kiri. A kiri furu sma di ben e lobi Yehovah. A ben e dini falsi gado èn a du tra ogri sani tu. Yehovah si ala den ogri sani di Iseibel du. San a ben o du nanga Iseibel?

Te fu kaba Akab dede. Bakaten, en manpikin Yoram tron kownu. Yehovah seni wan man di nen Yehu fu strafu Iseibel nanga en heri famiri.

Yehu teki wan asiwagi, dan a go na Yisreyel pe Iseibel ben e tan. Yoram teki en eigi asiwagi, dan a rèi go miti Yehu. A aksi en: ’Freide de na wi mindri?’ Yehu taki: ’Freide no o de solanga yu mama Iseibel e du ogri.’ Yoram ben wani drai gowe nanga en asiwagi. Ma Yehu sutu en nanga wan peiri èn a dede.

 Baka dati Yehu go na a kownu-oso fu Iseibel. Di Iseibel yere taki Yehu ben e kon, a go poti make-up, a kan en wiwiri, dan a go wakti Yehu na a fensre fu en sodrokamra. Di Yehu doro, Iseibel gi en odi na wan spotu fasi. Yehu bari gi den futuboi fu Iseibel di ben e tanapu na en sei: ’Trowe en kon na gron!’ Den pusu Iseibel komoto fu a fensre. A fadon kon na gron, dan a dede.

Baka dati Yehu kiri den 70 manpikin fu Akab èn a puru a Bâal anbegi na ini a kondre. A tori disi e leri wi taki Yehovah sabi ala sani. Te a ten fu en doro a o strafu den sma di e du ogri.