Bọu janelang istanane su Yizreel, Datu Ahab botonge makasilo sasuang anggorẹ̌ su baelẹ̌ i Nabot. Ahab mapulu měměli baelẹ̌ anggorẹ̌ ene. Katewe i Nabot madiri mẹ̌bal᷊ụ ual᷊ingu tumuhụ Hukung i Yehuwa, ěntanạ pusakạ tawe wotonge bal᷊ụkang. Ini něnodẹ apa nikoạ i Nabot seng nihino. Apa i Ahab měngẹ̌ngarěga putusang i Nabot? Tala. Ahab sěbạe nẹ̌pědu sarang i sie madiri suměbang bọu kamarẹ̌ kụ madiri kumaěng.

Kawing i Ahab, Ratu Izebel dal᷊akị, naul᷊ị si sie, ’I kau ini datung Israel. I kau botonge makaěbạ apa ikẹ̌kapulunu. Iạ měgělị baelẹ̌ ene si kau.’ Bọu ene, Izebel němohẹ suratẹ̌ su manga těmbonang su soa ene. I sie něngoro si sire pěnoke i Nabot seng něngutukẹ̌ Mawu kụ pěngěntung si sie dingangu watu sarang mate. I sire někoạ ene. Bọu ene Izebel nẹ̌bera si Ahab, ’Nabot seng nate. Baelẹ̌ anggorẹ̌ ene seng i kau piạ.’

Izebel bal᷊inẹ kětạeng němate si Nabot. I sie lai němate lawọ taumata wal᷊inẹ apang masayang si Yehuwa. I sie něněmbah berhala dingangu někoạ barang dal᷊akị bal᷊inẹ. Yehuwa nakasilo kěbị ene. Apa sarung koateng i Yehuwa si sie?

Su tempong Ahab nate, Yehoram anạe nakoạ datu. Yehuwa něngoro sěngkatau esẹ arenge Yehu gunang pěhukung si Izebel dingangu kěluargane.

Yehu simake karetane sarang Yizreel, tampạ Izebel mětẹ̌tanạ. Yehoram simongo gunang mẹ̌sombang dingangi Yehu kụ nẹ̌kiwal᷊o, ’Apa piạ dame su tal᷊oarang i kitẹ?’ Yehu simimbahẹ̌, ’Tawẹ apa dame mạeng Izebel, i mamạu, turusẹ̌  měkẹ̌koạ barang dal᷊akị.’ Yehoram apidu němutarẹ̌ karetane kụ timal᷊ang. Katewe, Yehu němana si Yehoram, kụ i Yehoram nate.

Bọu ene, Yehu nakoạ sarang istanang Izebel. Su tempong nakasingkạ i Yehu sumongo, Izebel nělěnggihẹ̌ gatine, něngatorẹ̌ utạe, kụ něhědo su janela rasị. Su tempong Yehu nahumpạ, Izebel nẹ̌bisara makasarẹ̌ si sie. Yehu němansagẹ̌ su manga pelayan i Izebel kụ dụdarisị su sěmběkane, ’Těnạko i sie!’ I sire něnuhudẹ̌ si Izebel bọu janela, kụ i sie nanawo sarang ěntana bọu ene nate.

Bọu ene, Yehu němate 70 anạ i Ahab kụ němurěsi banua ene bọu ibadah su Baal. Apa i kau nakasilo i Yehuwa masingkạ kěbị haghi, kụ su tempone i Sie sarung měhukung taumata ral᷊akị?