Husi janela iha palásiu iha Jezreel, Liurai Acab haree Nabot nia toʼos-uvas. Acab hakarak sosa toʼos-uvas neʼe, maibé Nabot lakohi faʼan tanba tuir Jeová nia Ukun-Fuan labele faʼan rai neʼebé hetan nuʼudar liman-rohan. Acab respeitu Nabot nia desizaun neʼe ka lae? Lae. Acab sai hirus tebes toʼo lakohi sai husi ninia kuartu no lakohi han.

Acab nia feen Liurai-Feto Jezabel neʼebé laran-aat dehan ba Acab: ‘Ó mak Izraél nia liurai. Ó bele hetan buat naran deʼit neʼebé ó hakarak. Haʼu sei hetan toʼos neʼe no fó ba ó.’ Jezabel hakerek karta ba katuas sira iha sidade neʼe hodi haruka sira atu duun katak Nabot hatete aat Maromak no tuda mate nia. Katuas sira halo tuir, no tuirmai Jezabel dehan ba Acab: ‘Nabot mate ona. Agora toʼos-uvas neʼe sai ó-nian.’

Jezabel laʼós deʼit oho Nabot, maibé mós oho ema barak neʼebé hadomi Jeová. Jezabel adora maromak falsu oioin no halo buat aat seluk tan. Jeová haree buat aat hotu neʼebé Jezabel halo. Saida mak Jeová sei halo ba nia?

Depois Acab mate tiha, ninia oan-mane Jeorão mak sai liurai. Jeová haruka mane ida naran Jeú atu fó kastigu ba Jezabel no ninia família.

Jeú saʼe ninia kuda-karreta atu bá Jezabel nia palásiu iha Jezreel. Jeorão bá ho ninia kuda-karreta hodi hasoru Jeú no husu: ‘Ó mai ho dame ka lae?’ Jeú dehan: ‘Sei la iha dame se ó-nia inan Jezabel moris hela no halo buat aat oioin.’ Jeorão koko atu fila ninia kuda-karreta no halai. Maibé Jeú hana Jeorão, no nia mate.

 Tuirmai Jeú bá Jezabel nia palásiu. Bainhira Jezabel rona katak Jeú atu mai, nia pinta oin, halo furak ninia fuuk, no hein Jeú iha janela iha andár leten. Bainhira Jeú toʼo, Jezabel hasé nia la ho respeitu. Jeú hakilar ba atan sira iha Jezabel nia sorin: “Soe tun nia!” Sira soe sai Jezabel husi janela, nia monu tun ba rai no mate.

Liutiha neʼe, Jeú haruka ema atu oho Acab nia oan-mane naʼin-70 no halakon adorasaun ba Baal husi nasaun neʼe tomak. Jeová hatene buat hotu, no iha tempu neʼebé loos nia fó kastigu ba ema neʼebé halo buat aat.