Kuti kali awindo lyaŋanda yakwe mu Jezreeli, Mwami Ahabu wakali kukonzya kuubona muunda wamwaalumi wazina lya Naboti. Ahabu wakali kuuyanda muunda ooyu, alimwi wakasola kuti awuule kuli Naboti. Pele Naboti wakakaka kumusambalila muunda ooyu Ahabu nkaambo eeci tiicakali kuzumizyigwa a Mulawo wa Jehova kusambala nyika yacikono. Sena Ahabu wakamukkomanina Naboti akaambo kakucita cintu ciluzi? Peepe. Ahabu wakanyema kapati. Wakanyema kapati cakuti wakaalilwa kuzwa muŋanda yakwe, alimwi wakatakata kulya.

Mukaintu mubi wa Ahabu, Jezebeli, wakamwaambila kuti: ‘Yebo uli mwami wa Israyeli. Ulakonzya kucita kufwumbwa ncoyanda. Ndiyookubwezela muunda uulya kutegwa ube wako.’ Wakalemba magwalo kubaalu bamumunzi akubaambila kuti bamubejelezye Naboti kuti watukila Leza akuti bamufwuse mabwe kutegwa afwe. Baalu bakacita mbubwenya mbwaakabaambila Jezebeli, mpoonya Jezebeli wakaambila Ahabu kuti: ‘Naboti wafwa! Lino Muunda waba wako.’

Naboti tanaakali ngomuntu alikke iwakajaigwa a Jezebeli kakunyina kaambo. Wakajaya bantu banji ibakali kumuyanda Jehova. Wakali kukomba baleza bakubeja alimwi wakacita zintu azimwi zibi. Jehova wakazibona zintu zibi zyoonse nzyaakacita Jezebeli. Aboobo sena wakamulanga buyo?

Naakafwa Ahabu, mwanaakwe Jehoramu wakaba mwami. Jehova wakatuma mwaalumi wazina lya Jehu kutegwa asubule Jezebeli alimwi amukwasyi wakwe.

Jehu wakatanta nkalaki yakwe akuunka ku Jezreeli, ooko Jezebeli nkwaakali kukkala. Jehoramu wakaboola katantide nkalaki yakwe kutegwa baswaangane a Jehu mpoonya wakamubuzya kuti: ‘Sena kuli luumuno akati kesu?’ Jehu wakati: ‘Kunyina nokunga kwaba luumuno kufwumbwa kuti banyoko, ba Jezebeli kabacizumanana kucita zintu zibi.’  Jehoramu wakali kuyanda kunyona nkalaki yakwe kutegwa atije. Pele Jehu wakayasa Jehoramu asumo, kumane wakafwa.

Mpoonya Jehu wakaunka kuŋanda yamwami Jezebeli. Naakamvwa kuti ulaboola, Jezebeli wakalipenta-penta akubamba masusu aakwe, mpoonya wakalindila muŋanda yamujulu awindo. Ciindi Jehu naakasika, wakamwaanzya cabukali. Jehu wakoompolola kubabelesi ba Jezebeli ibakali afwaafwi anguwe kuti: ‘Amumusowele ansi!’ Bakamutonkela awindo Jezebeli, mpoonya wakawida aansi akufwa.

Nozyakamana kucitika zintu eezyi, Jehu wakajaya bana ba Ahabu ibali 70 akugwisya bukombi bwa Baala mucisi coonse. Sena wabona kuti Jehova ulizizyi zyoonse zicitika akuti aciindi ceelede ulabasubula bantu ibacita zintu zibi?