Ахав хаанның Изреел хоорайда ордузунуң соңгазындан Навуфей дээр кижиниң виноградының шөлү көстүп турган. Хаан ол шөлдү аажок сонуургап, ону садып алыксай берген. Ынчалза-даа Навуфей шөлүн сатпаан, чүге дизе ол аңаа өнчү кылдыр келген. Иегованың хоойлузундан алырга, ындыг шөлдү сатпас ужурлуг турган. Ахав канчалган? Навуфейни мактаар хамаанчок, ол аажок хорадап, өрээлинден үнмейн, чем чииринден ойталаан.

Ахавтың кадайы каржы кадын Иезавел ашаанга: «Сен Израильдиң хааны болгай сен, сээң сөзүң — хоойлу. Ол шөл сээң боор» — дээн. Иезавел кадын хоорайның баштыңнарынче чагаа бижээн. Ол аңаа Навуфей Бурганны куду көрген деп буруудаткаш, ону даштар-биле соп кааптарын дужааган. Баштыңнар шак ынчаар кылган. Ооң соонда Иезавел Ахавка: «Навуфей чок апарган. Ооң шөлү сээңии-дир» — дээн.

Каржы Иезавелдиң холундан чүгле Навуфей эвес, а оон-даа өске эки улус амы-тынындан чарылган. Ол кадын меге бурганнарга чүдүп, дыка хөй багай чүүлдер кылып чораан. Иегова ол бүгүнү көргеш, ону кезедир деп бодап алган.

Ахав чок апаарга, ооң оглу Иехорам хаан апарган. Иезавелди болгаш ооң өг-бүлезин кезедир кылдыр, Иегова Иехуга дагзып каан.

Иеху чуузазын белеткеп алгаш, кадынның чурттап турар чери Изреелче чорупкан. Иехорам Иехуже уткуштур үнүпкеш, оон айтырган: «Тайбың келдиң бе?» Иеху аңаа: «Сээң аваң Иезавел каржы-дошкун чүүлдер кылып турда аравыска тайбың турбас» — дээн. Иехорам чуузазын ээп алгаш, дезип чоруптар деп бодаан. Ынчалза-даа Иеху ча-биле адыптарга, ол чок апарган.

 Ооң соонда Иеху Иезавелдиң ордузунче халдып чорупкан. Ол бүгүнү дыңнааш, Иезавел чажын дырап, карактарын будааш, кырыкы каъттың соңгазынга манап олурган. Иеху чедип кээрге, ол ону кочулап, мендилээн. Иезавелдиң чанында чалчаларынга Иеху: «Ону дүжүр октаптыңар!» — деп алгырган. Олар Иезавелди черже дүжүр октаптарга, ол чок апарган.

Соонда Иеху Ахавтың 70 оглун өлүрүп кааш, меге Ваал бурганның чүдүлгезинден Израильди арыглаан. Иегова шупту чүвени көрүп турар база үези кээрге, багай ажыл-херек кылып турар улусту албан шиидер деп көрдүвүс.