Soma Ahava poku vanja ponjanela yelombe liaye ko Yesirele, wa ponduile oku mola ocumbo cimue cayuva culume umue o tukuiwa hati, Navote. Ahava wa yonguile ocumbo caco cayuva kuenje wa seteka oku ci landa ku Navote. Pole, Navote ka tavele oku ci landisa momo Ocihandeleko ca Yehova ci pisa oku landisa ocipiñalo cofeka. Anga hẽ Ahava wa lekisa esumbilo kocisimĩlo ca Navote coku linga eci ca sunguluka? Sio. Ahava wa temẽle calua. Eye wa temẽle calua okuti ka yonguile oku tunda vohondo kuenda wa likala oku lia.

Nasoma Isevele ukãi ondingaĩvi wa Ahava wa popia hati: ‘Ove vusoma ya va Isareli. Ove o pondola oku kuata cosi o yongola. Ame ndi tambula ocumbo kuenje ndi ceca kokuove.’ Isevele wa soneha ovikanda kakulu o volupale, wa va sapuila oco va lundile Navote okuti wa popia Suku etonãi kuenje a sosuiwe lovawe toke eci a fa. Noke akulu va linga ndomo Isevele a va tumile kuenje Isevele wa sapuila Ahava hati: ‘Navote wa fa. Ocumbo cayuva kaliye cove.’

Navote ka kaile omunu watete Isevele a ponda okuti ka kuatele eko. Eye wa ponda omanu valua va solele Yehova. Isevele wa enda oku fendela oviteka kuenda wa linga ovina vikuavo vĩvi. Yehova wa mola ovina viosi vĩvi Isevele a linga. Nye Yehova a laikele oku linga ku Isevele?

Noke yolofa via Ahava, omõlaye Yehorama wa linga osoma. Yehova wa tuma ulume umue o tukuiwa hati Yehu, oco a yambule Isevele kumue lepata liaye.

Yehu wa londa vekãlu liaye wa enda ko Yesirele, kuna kua kala Isevele. Yehorama weya lekãlu liaye muẽle oku ñualehẽla la Yehu kuenje wa pula kokuaye hati: ‘Pokati ketu pali Ombembua?’ Yehu wa tambulula hati: ‘Osimbu ina yove Isevele a kasi oku linga ovina vĩvi, ka ku kala ombembua.’ Yehorama wa seteka  oku ñualisapo ekãlu liaye kuenda oku tila. Pole, Yehu wasa lohonji Yehorama kuenje wa fa.

Noke Yehu wa enda kelombe lia Isevele. Eci Isevele a yeva okuti Yehu o kasi loku iya, wa liposuisa kocipala caye, wa limiangulula kutue kuenje wa kevelela ponjanela yaye kosapalalo. Eci Yehu a iñila, Isevele wo lama lomanya. Yehu wa kalukila akuenje va Isevele vana va talama ocipepi la Isevele hati: “U leñuili posi!” Ovo va leñuila Isevele ponjanela kuenje wa kupukila posi, yu wa fa.

Noke yovina evi, Yehu wa ponda 70 komãla va Ahava kuenda wa yelisa ofeka kefendelo lia Baale. O pondola hẽ oku limbuka okuti Yehova wa kũlĩha ovina viosi kuenda votembo ya sokiyiwa o ka yambula vana va kasi oku linga ovina vĩvi?