Nakikita ni Hadi Ahab ha bintana han iya palasyo ha Jesreel an urubasan nga gintatag-iya ni Nabot. Naruyagan niya ito, ngan ginsidngan hi Nabot nga papaliton niya ito. Pero nadiri hi Nabot kay ha Balaud ni Jehova diri puydi ibaligya an napanunod nga tuna. Ginrespeto ba hiya ni Ahab kay ginbuhat niya an husto? Waray. Nasina gud hi Ahab. Salit nadiri na hiya paggawas ha kwarto ngan nadiri pagkaon.

An asawa ni Ahab, an maraot nga hi Rayna Jesebel, nagsiring ha iya: ‘Ikaw an hadi han Israel. Makukuha mo an bisan ano nga karuyag mo. Kukuhaon ko ito nga tuna para ha imo.’ Ginsuratan ni Jesebel an katigurangan han syudad nga akusaran hi Nabot nga iya iginsumpa an Dios, ngan batuhon hiya tubtob mamatay. Ginbuhat ito han katigurangan. Katapos, hi Jesebel nagsiring kan Ahab: ‘Patay na hi Nabot. Imo na an urubasan.’

Diri la hi Nabot an inosente nga tawo nga iginpapatay ni Jesebel. Damu nga nahigugma kan Jehova an iya iginpapatay. Nagsingba hiya ha mga dios-dios ngan nagbuhat hin damu pa nga karaotan. Nakita ni Jehova an karaotan ni Jesebel. Ano an iya bubuhaton kan Jesebel?

Kamatay ni Ahab, an iya anak nga hi Jehoram an nagin hadi. Ginsugo ni Jehova hi Jehu nga sirotan hi Jesebel ngan an iya pamilya.

Sinakay hi Jehu hin karuwahe pakadto ha Jesreel, diin naukoy hi Jesebel. Gintapo hiya ni Jehoram sakay hin karuwahe, ngan nagpakiana: ‘May kamurayawan ba ha aton?’ Hi Jehu nagsiring: ‘Diri magkakaada kamurayawan samtang nagbibinuhat hin maraot an imo nanay nga hi Jesebel.’ Ginpaliko dayon ni Jehoram an iya karuwahe basi makapalagiw. Pero ginpana hiya ni Jehu salit namatay hiya.

 Katapos, kinadto hi Jehu ha palasyo ni Jesebel. Han hinbaroan ni Jesebel nga tiabot hi Jehu, nag-makeup hiya, nag-ayos han iya buhok, ngan naghulat ha may bintana ha igbaw han palasyo. Pag-abot ni Jehu, gin-insulto hiya ni Jesebel. Gumuliat hi Jehu ngan ginsidngan an mga surugoon ni Jesebel: “Ihulog hiya!” Ginhulog ha bintana hi Jesebel han mga surugoon nga kasapit niya salit namatay hiya.

Katapos hito, iginpapatay ni Jehu an 70 nga anak ni Ahab ngan ginwara ha nasud an pagsingba kan Baal. Naobserbaran mo ba nga maaram hi Jehova han ngatanan nga nahitatabo ngan iya ginsisirotan ha husto nga panahon an mga nagbubuhat hin maraot?