Palacio xtuny Acab goyoʼni lainy gudx Jezreel né desde roʼ bentan labúu bienlóobu layoo balach xtuny Nabot. Acab bioladxbu xalioo Nabot né nábu nasiʼbu láani. Per Nabot diti gosaguel natoʼ láani portín Ley xtuny Jehová goniʼ que toib israelita diti non natoʼbu layoo ni bisiané bixiosbu láabu. Xpensarylo, ¿bioladx Acab mod ni buny Nabot la? Yaca. Bidzuitzhuaity Acab, xtol ngú diti godóbu né biegyoʼbu.

Tzeʼel Acab góc Jezabel toib buñgonaʼ nigolú mal ni buny mandary. Gonaʼ reʼ gochbu Acab: «Looy naclo rey xtuny Israel, looy labúu gaplo guirá ni nainy looy. Naʼ labúu guiyobi mod par guicaʼlo layoocu». Jezabel bicaʼbu tipnés guiich ló ancianos de gudxcú. Né ló guiichcú bunybu mandary nacá que Nabot goniʼ mal de Dios né nagasguieeyibu Nabot par ñaity. Guirá ancianoscu bisobyibu ni goniʼ Jezabel. Después Jezabel gochbu Acab: «Nigoreʼ ma goity Nabot, ma labúu guianélo xaliobu».

Diti nosi Nabot bigaity Jezabel láaca bigaitybu stipnés buñ ni bieen Jehová. Jezabel láaca biembu dioxh falz né bunybu stipnés cós mal. Jehová bibiʼ guirá cós mal ni bunybu. ¿Natuidy Jehová guirá xcalkié Jezabel scásiʼ la?

Órni goity Acab, xiimbu Jehoram gosaló buny mandary. Ór cú bixel Jehová toib buñguieeu ni laa Jehú par gony castigar Jezabel né xfamily.

Jehú biaʼpy lainy xcamión né goyeebu Jezreel, ro golés Jezabel. Jehoram láaca biaʼpy lainy xcamión né goyeebu bidzaglóbu Jehú. Órni gon saʼyibu ló néz, Jehoram gonabdiitz láabu: «¿Noʼno sacró né saʼno la?». Né Jehú cuapy láabu: «Yaca. Diti labúu sioʼno sacró portín  xinaʼlo Jezabel cayonygoluʼ cós mal». Órcuca Jehoram ná nabiguet né xcamión, per Jehú bicuaʼc láabu né goitybu.

Después goyee Jehú ronoʼ palacio xtuny Jezabel. Órni biembu que cadxin Jehú lidxbu, ór cú bitiébu lóbu, bunytzaaybu guitzguicbu né gorúbu roʼ bentan ni noʼ guiaʼ. Órni bidxin Jehú, Jezabel bixiich láabu. Né ór cú Jehú bicarudx xomós Jezabel né goniʼbu: «¡Colguisal láabu layoo!». Né layibu bichupiaʼyibu Jezabel roʼ bentan né láabu biabbu né goitybu.

De ngú, Jehú bigaity 70 xiin Acab né ma diti goyoʼ ni bieen Baal lainy gudxcú. ¿Raduidylo cuent que Jehová rabiʼ guirá ni rac la? ¿Né que radxin dzú rony castigarbu buñ ni rony cós mal la?