Jehosafatajj Judá tribun reyipänwa, jupaw Baal diosan altaranakapsa, uka markan utjkäna uka idolonaksa tʼunjäna. Jaqenakajj Jehová Diosan leyinakap yatipjjaspa ukwa munäna. Ukatwa markan pʼeqtʼirinakapampiru levitanakampirojj Judá markpachar khitäna, ukhamat Jehová Diosan leyinakap yatichapjjañapataki.

Jehová Diosajj wal Judá markar yanapäna, ukatwa uka jakʼankir markanakajj jan jupanakampi nuwasiñ munapkänti. Antisas Jehosafat reyitakejj regalonak apapjjerïna. Ukampis Ammón, Moab markanakasa, Seír toqenkir markanakasa, Judá markampi nuwasiriw jutapjjäna. Jehosafat reyejj Jehová Diosan yanaptʼap wakisitap amuyäna. Ukatwa taqpach chachanakaru warminakaru wawanakaru Jerusalenar tantachthapïna. Jupanak nayraqatanwa akham mayisïna: ‘Jehová Dios, jan yanaptʼapkitasmajj janiw atipapkiristti. Mirä amp suma, kun lurañas wakisi uk sapjjakitaya’ sasa.

Jehová Diosajja Jehosafat reyir istʼasajj akham sänwa: ‘Jan ajjsarapjjamti, nayaw yanaptʼapjjäma. Lugaranakamar saytʼasipjjam, jan kuns lurapjjamti, kunjamsa nayajj salvapjjäma uk uñjapjjarakim’ sasa. ¿Kunjamsa Jehová Diosajj salväna?

Qhepüru alwajja, Jehosafat reyejj cantirinakwa ajllïna, soldadonak nayra sarapjjañapwa mayirakïna. Jerusalenat mistusajj nuwasiñ lugararuw sarapjjäna, ukasti Tecoa sat lugarankänwa.

Cantirinakajj wali kusisitaw jachʼat Jehová Diosar alabanzanak cantapjjäna. Ukañkamajj Jehová Diosaw markap laykojj nuwasïna. Ammón, Moab markankirinakarojj pantjayänwa, ukatwa jupanakkam nuwarasisajj taqeni jiwarapjjäna. Jehová Diosaw Judá markankir jaqenakarusa, soldadonakarusa, sacerdotenakarusa jarkʼaqäna. Uka jakʼankir markanakajj taqeniw kuntï Diosajj lurkäna uk yatipjjäna. Ukhamatwa Jehová Diosajj markapar yanapaskakitap yatipjjäna. ¿Kunjamsa Diosajj markapar yanapi? Kunaymanitwa yanaptʼi. Ukham lurañatakejj janiw jaqenakan yanaptʼap munkiti.