Si Josapat ma raja ni halak Juda. Dibolongkon ibana do sude patung di luat i. Lomo rohana asa sude jolma mamboto patik ni Jahowa. Alani i, disuru ma angka pemimpin dohot halak Lepi mangajarhon patik ni Jahowa tu sude halak di Juda.

Mabiar do angka bangso na disi mangalo halak Juda. Ala diboto nasida, naposo ni Jahowa do halak Juda. Diboan nasida ma hadiah tu Raja Josapat. Alai ro do halak Moab, halak Ammon dohot halak sian Seir mangalo Juda. Diboto si Josapat ma na porlu do ibana urupan ni Jahowa. Disuru ma sude baoa, borua, dohot dakdanak asa ro tu Jerusalem. Martangiang ma si Josapat, didok ma, ‘Holan Ho do na boi mambahen hami monang. Paboa ma aha na ingkon ulahononnami.’

Ditangihon Jahowa do tangiangna i. Didok Jahowa, ‘Unang mabiar ho. Urupanku do ho. Jongjong ma ho disi, paima ma jala ida ma paluaonku do ho.’ Songon dia do Jahowa paluahon nasida?

Manogotna i, dipillit si Josapat ma angka parende jala didok ma asa marbaris nasida di jolo ni angka tentara. Marbaris ma nasida sian Jerusalem sahat tu Tekoa, inganan ni nasida marporang.

Saleleng marende nasida mamuji Jahowa marhite soara na gogo, dibahen Jahowa ma halak Ammon dohot halak Moab marsibunuan jala ndang adong na malua. Alai dipalua Jahowa do halak juda, tentarana, dohot angka malim. Sude halak na adong di humaliang ni luat i, mambege aha naung diulahon Jahowa. Jala diboto nasida ma sai didongani Jahowa do angka naposona. Songon dia do Jahowa paluahon naposona? Marhite godang cara. Ndang dihaporluhon Jahowa pangurupion ni na asing laho mangulahon i.